erdoghan giruziye we éfiyopiye bash ministirliri bilen körüshti

türkiye awazi radiyosi xewiri: jumhur reislik mehkimisi uchur-alaqe idarisi jumhur reis rejep tayyip erdoghanning giruziye bash ministiri we éfiyopiye bash ministiri bilen ayrim-ayrim téléfonda körüshkenliki toghrisida bayanat élan qildi.

bayanatta bildürülishiche, rejep tayyip erdoghan bilen giruziye bash ministiri irakli garibashwilining téléfon söhbitide, türkiye-giruziye munasiwetliri we rayonluq mesililer muzakire qilinghan.

rejep tayyip erdoghan türkiye-giruziye istratégiyelik shériklik munasiwetlerning bügünkidek künlerde téximu ehmiyetlik halgha kelgenlikini eskertip, giruziyeni rayonluq hemkarliqlarda achquchluq dölet süpitide köridighanliqlirini bildürgen.

u bolupmu, rayonluq qatnash we énérgiye yetküzüsh linyelirining ünümi we xewpsizliki nuqtisidin birlikte heriket qilishning zörür ikenlikini tekitlep, ministirlar we parlamént ezaliri muweppeqiyetlik halda ijra qiliwatqan türkiye-giruziye-ezerbeyjan üch terep méxanizmini, aliy rehberler sewiyeside janlandurushni xalaydighanliqlirini tilgha alghan.

jumhur reis rejep tayyip erdoghan éfiyopiye bash ministiri abiy ehmet bilenmu téléfonda körüshti.

bu körüshüshtimu, türkiye-éfiyopiye munasiwetliri we rayonluq munasiwetler muzakire qilindi.

rejep tayyip erdoghan éfiyopiyening xatirjemliki we muqimliqigha ehmiyet béridighanliqlirini bildürüp, türkiyening éfiyopiyege her türlük yardemlerni qilishni dawamlashturidighanliqini qeyt qildi.