erdoghan 15-iyul munasiwiti bilen xelqqe xitab qildi

türkiye awazi radiyosi: 15 - iyul herbiy – siyasiy özgirish qozghashqa urunush herikitining besh yilliqi munasiwiti bilen xelqqe xitab qilghan jumhur reis erdoghan: «2016 - yili 15 - iyul jüme küni kechte bashlinip, etisi küni xelqimizning ayighi astida cheylinip axirlashqan bu herbiy – siyasiy özgirish qozghash urunushi, ibret (sawaq) höjjiti süpitide tariximizdiki ornini aldi. ewladmu ewlad millitimizning her bir ezasi tarixtin buyan misli körülüp baqmighan bu xiyanetni her qétim ésige alghanda, musteqilliqimiz we kelgüsimizge téximu ching ésilidu» dédi.

jumhur reis rejep tayyip erdoghan  15 - iyul démokratiye we milliy ittipaqliq künini xatirilesh pirogrammisi dairiside, jumhur reislik mehkimisi binasidin xelqqe xitab qildi.

u biwasite tarqitilghan «xelqqe xitab» namliq téléwiziye nutuqida töwendikilerni qeyt qildi:

«qedirlik xelqim, silerge eng chin héssiyatim we söygüm bilen salam yollaymen. bügün dölet we xelq hayatimizning hem eng qebih hujumining, hem eng shanliq qarshiliq körsitishlirining birining besh yilliq xatire küni. men nutuqumni shu küni kechte  <bedirning shirliridek shanliq> küreshliri esnasida bir etirgül baghchisigha kirgendek yerge yiqilghan 251 shéhitimizge allahtin rehim – shepqet tilesh bilen bashlimaqchimen.

her birining hékayisi ayrim bir dastan bolghan shéhitlirimiz, <kelgin séni tarixqa kömeyli> dések sighmighudek büyük qehrimanliqliri arqiliq bu milletke képen pichqanlargha tégishlik sawiqini berdi. peyghemberliktin kéyinki eng shereplik maqamgha, perwerdigarimizning dergahidiki eng yüksek mertiwige yetken shéhitlirimizgha bolghan wapadarliq burchimizni, ular qaldurup ketken amanetlerge ige chiqish we ada qilishqa tirishmaqtimiz.

«biz dölitimiz we xelqimizge qilinghan xiyanetni qetiy untup qalmaymiz»

er – ayal, qéri – yash, oqutquchi – oqughuchi, xojayin – xizmetchi, kadir – kasip, qisqisi barliq yash, kesip we qatlamgha mensup insanlar bu hayasizlarche hujumgha köksini kérip, kocha we meydanlarni toldurup, körgenla yéride herbiy – siyasiy özgirish qozghashqa urunghuchilarning yolini torap, zörür tépilghanda aldigha sélip qoghlap, anidin, perzenttin, mal – dunyadin kéchip qilghan küreshliri esnasida ghaziliq sheripige érishken qérindashlirimizghimu eng chongqur minnetdarliqimni sunimen.

allahqa étiqad qilidighan xelqimizning musteqilliq söygüsi, erkin yashighan bayriqimizning nazlinip lepildishi we dölitimiz asminida menggü yangraydighan ezanlirimizning awazi guwahchimiz bolsunki؛ dölitimiz we xelqimizge qilinghan xiyanetni hergiz untup qalmaymiz. biz bu xainliqning hésabini qolgha chüshürgen, éniqlighan barliq xainlardin soriduq we dawamliq soraymiz. axirettimu bu iblis dostlirining yaqisidin tutimiz, rozi mehsherdimu ularni qoyuwetmeymiz.

qedirlik xelqim, 2016 - yili 15 - iyul jüme küni kechte bashlinip, etisi küni xelqimizning ayighi astida cheylinip axirlashqan bu herbiy – siyasiy özgirish qozghash urunushi, ibret (sawaq) höjjiti süpitide tariximizdiki ornini aldi. ewladmu ewlad xelqimizning her bir ezasi tarixtin buyan misli körülüp baqmighan bu xiyanetni her qétim ésige alghanda, musteqilliqimiz we kelgüsimizge téximu ching ésilidu.

dölitimiz, elwette jumhuriyet tarixida nurghun siyasiy özgirishlerge, siyasiy özgirish qozghash urunushlirigha, isyanlargha we térrorluq hujumlirigha duchar boldi. emma, shu küni kechte yüz bergen ishlar bizge öz dölitige, öz xelqige miltiq tengligen, bigunah kishilerning qénini tökken bu satqunlarning dunyadiki eng peskesh mexluqlargha qandaq aylinidighanliqini körsitip berdi.

emeliyette, milletlerni milletke aylanduridighan éléméntlarning biri, ularning tarixidiki bu xil azab, jan we qan bilen yughurulghan ghelibilerdur. biz ming yilliq wetinimizning tikensiz etirgül baghchisi emeslikini, eksiche her bir künining dégüdek japaliq küreshler bilen ötkenlikini bilimiz. biz ming yildin buyan dunyadiki her qaysi dölet we jemiyetler eng yaqturidighan jughrapiyelik orunni  weten qilishning we weten qilip saqlap qélishining bedilini tölewatimiz. etrapimizdiki yéqinqi bir qanche esirdin buyan yüz bériwatqan ishlarni körginimizde, bu bedelning mukapatini ittipaqliqimiz, barawerlikimiz, qérindashliqimiz, dölitimiz we kelgüsimizni qutquzush bedilige alghanliqimiz bir heqiqettur.

«ular bizning ulugh medeniyet we tarix mirasigha ige chiqiwatqanliqimizni chüshenmeydu»

arqimizda qalghan sekkiz yildiki oxshimighan körünüshlerdiki hujumlar wetinimizni qoghdash kürishimizning dawam qilidighanliqini körsitip béridu. p k k din tartip daésh we fetö (fethullahchi térrorluq teshkilati) ghiche bolghan türlük shekillerdiki térrorluq teshkilatiliridin paydilinip ijra qilinmaqchi bolghan sénariyelerning meqsiti, wetinimizni tiz püktürüsh, millitimizni qul qilish, zéminimizni bulang – talang qilishtur. biz orun alghan her bir xelqaraliq supidiki türkiyege qarshi namayan qiliniwatqan qosh ölchemler oxshash sénariyening bashqiche wariyanti hésablinidu.

nechche ming, nechche on ming kilométir yiraq yerdin térrorluqqa qarshi turush bahanisi bilen kélip, qelb jughrapiyemizni qan we köz yéshigha gherq qilghanlar,  milyonlighan kishilerning kelgüsini zulmetke aylandurghanlar, türkiyenimu oxshash teqdirge duchar qilalmasliqning zerdisini chekmekte. özining bixeterliki we rahet – paraghitini kapaletke ige qilish üchün dölitimizni qalqan qilip ishlitiwatimiz dep oylawatqanlar, eslide bizning ulugh medeniyet we tarix mirasigha ige chiqiwatqanliqimizni chüshenmeydu, chüshinelmeydu. rayonimizning tinchliqi, xatirjemliki, muqimliqi we bixeterlikige kapaletlik qilish üchün körsetken tirishchanliqimiz we pidakarliqimiz mahiyette ulugh hemde qudretlik türkiye qurush yolidiki barghanséri küchiyiwatqan oyghinishning ayagh tiwishliridur.

gezi (sayahet baghchisi) weqeliri arqiliq ijtimaiy dezlerni peyda qilmaqchi bolghanlar, emeliyette bedinimizge ittipaqliq we barawerlik waksinasi urghanliqini körüp yételmidi. siyasiy özgirish arqiliq milletning iradisini yoqitip dölitimizni igilimekchi bolghanlar, nechche ming yilliq enenining axirqi halqisini téximu chingitqanliqini hés qilalmidi. térrorluq teshkilatlirini ishqa sélip zéminimizgha tehdit salghanlar, qilmishlirining emeliyette qérindashliqimizni mustehkemligenlikini chüshinip yételmidi.

«ular büyük we küchlük türkiyening qurulushini tosup qalalmaydu»

sherqtin gherbke, shimaldin jenubqa, qisqisi hemmila tereptin wetinimizni chongqur tarixi we medeniyet munasiwiti bolghan rayonlardin ayriwetmekchi bolghanlar téximu küchlük muhebbet rishtisi ornitishimizgha wasite bolghanliqini hés qilalmidi. biz peqet pütkül insaniyetke wakaliten otturigha qoyghan hoquq we adalet telipimizni, özliriningkige oxshash siyasiy riyakarliq dep qarighanlar, mezlumlarning awazi, nepisi we ümidige aylinishimizning sirini chüshinelmidi. goya 15 – iyul kéchisi xelqimizning dunyaning eng ilghar urush qorallirini quruq qolliri bilen  toxtatqanliqini chüshinelmigendek, ular dölitimizning bashqa mesililerge tutqan pozitsiyesining sewebinimu bilelmidi.

halbuki, biz peqet özimiz üchün némini ümid qilghan bolsaq, pütkül jughrapiyemiz, barliq dostlirimiz, pütkül insaniyet üchünmu oxshash nersini ümid qilimiz.  biz buni bashqa muddialirimizni yoshurush üchün emes, semimiylik bilen qilghanliqimiz üchün, qeyergila barmayli, qizghinliq bilen qobul qilinmaqtimiz we qedirlenmektimiz. biz tünügün süriyede, liwiyede qilduq, qarabaghda shundaq qilduq. ete afghanistan we bashqa jaylardimu oxshash semimiylik we adilliq bilen qérindashlirimizni qollaymiz.

15 - iyul yalghuz dölitimizdiki musteqilliqimiz we kelgüsimizni qoghdashning simwoli bolupla qalmay, yene bu ulugh tesewwurningmu simwoli. elwette, bashqa mesililerge oxshash, bu heqiqetmu körüshni xalaydighan közler, anglashni xalaydighan qulaqlar, sözleshni xalaydighan tillar, chüshinishni xalaydighan eqiller, xushalliq bilen salmaqchi bolghan yürekler, ümidke tolushni xalaydighan köngüller üchün küchke ige.

xudagha shükri, xelqimiz bizni chüshinidu, yönilishimizni körsitip béridu we biz bilen bille mangidu. shunglashqa biz dölitimizni esirge almaqchi bolghan mustemlikichilerge bir esir ilgirikige oxshash «türkiyeni yéngip ötkili bolmaydu» dewatimiz. shunglashqimu xelqimizge qarshi yoshurun muddialargha ige yaman niyetliklerge <ghelibe qilalmaysiler> dewatimiz. ular tünügünmu, bügünmu muweppeqiyet qazinalmidi, etimu — inshaallah — muweppeqiyet qazinalmaydu, ulugh we küchlük türkiye qurulushigha tosqunluq qilalmaydu.

«bizning yoldishimiz xelqimizdur»

kim kim bilen bille mangghusi kelse mangsun, bizning yoldishimiz xelqimizdur. biz yoldishimiz malazgirttin tartip istanbulni pethi qilish (boysundurush) qiche, chanaqqeledin musteqilliq urushighiche, qibris yürüshidin 15 - iyulghiche bolghan musapidiki barliq shéhitlirimizdur. bizning yoldishimiz her birini dunyagha teng qilghili bolmaydighan küresh iradisige ige ghazilirimizdur. bizning yoldishimiz aq saqalliq bowilirimizning we aq licheklik momilirimizning köz yashlirini töküp turup qilghan dualiridur. bizning yoldishimiz dunyaning her qaysi jayliridiki qelbi we közini bizge tikken iziliwatqanlarning ümididur. bizning yoldishimiz özi we döliti üchün qanliri urghup turuwatqan, pilan – layihelirini tüzgen, nishanini 2053 – yiligha qaratqan yashlirimiz, perzentlirimizdur. qalghini bikar geptur.

arximéd : «manga pishang béringlar, dunyani heriketlendürimen» dégen bolsa, biz deymizki, biz bu büyük xelq bilen dunyanimu heriketlendürimiz, jahanghimu hökümranliq qilimiz we kainatqa nidayimizni anglitimiz. allah bizge yardem qilsun.

rebbimizdin bizni ikkinchilep 15 - iyulgha oxshash xiyanet bilen sinimasliqini tileymiz. perwerdigarimizdin wetinimizni we millitimizni qoghdishini soraymiz. rebbimiz her bir ishimizni asanlashturup bersun we barliq tirishchanliqlirimizni meqsitige yetküzsun.

men bu qarashlirim bilen sözlirimni axirlashturushtin burun, seyshenbe küni yétip kélidighan qurban héytni aldin tebrikleymen. rebbimdin bu mubarek künlerning hörmiti üchün xelqimizni, musulmanlarni we pütkül insaniyetni nijatliqqa érishtürüshini tileymen. hemminglargha bolghan méhri - muhebbitim we hörmitini bildürimen. aman bolunglar!»