enqere türkiye bayriqigha qilinghan hörmetsizlikni qattiq eyiblidi

türkiye awazi radiyosi xewiri: türkiye jumhuriyiti tashqi ishlar ministirliqi bayanatchisi tanju bilgich bu heqtiki soalgha qayturghan yazma jawabida: «biz liwiyening tobruk shehiride 2021-yil 5-iyul ötküzülgen xamchot söhbiti jeryanida awam palatasi waqitliq binasi aldida bayriqimizgha qaritilghan qebih qilmishni qattiq eyibleymiz» dégen ibarilerge orun berdi.

bilgich jawabida, bu qebih qilmishtin xewer tapqandin kéyin, türkiyening trablusta turushluq elchixanisi liwiye tashqi ishlar ministirliqiigha weqe toghrisida yazma we éghzaki halette pozitsiyesini bildürgenlikini eslitip ötti.

u, bu xil ighwagerchiliklerge yol qoyulmasliqi we mushuninggha oxshash weqelerning qayta yüz bérishining aldini élish üchün zörür tedbirlerning qollinilishining telep qilinghanliqini tilgha élip: «bu heriketning türkiye-liwiye qérindashliqigha buzghunchiliq qilishni nishan qilghanliqi éniq. musteqilliqimiz we muqeddes qimmet qarishimizgha wekillik qilidighan bayriqimizgha qilinghan bu hujumning hergizmu meqsitige yételmeydighanliqini we tégishlik inkaslarni bashqilardin burun dost we qérindash liwiye xelqining bildüridighanliqini bildürimiz» dédi.

liwiyediki ishghalchi xelipe hafter terepdarliri, aldinqi küni liwiye bash ministiri abdulhemid dibeybe tobruk shehirini ziyaret qiliwatqan esnada uning mashinisi ötidighan yolgha türkiye bayriqini qoyup ighwagerchilik qilishqa urunghanidi.