qurtulmush: pelestin dewasini islam dunyasining birinchi nomurluq küntertipige aylandurush burchimizdur

türkiye awazi radiyosi xewiri: numan qurtulmush adalet we tereqqiyat partiyesi merkiziy binasida türkiyede dölet ishliri ziyaritide boluwatqan iyordaniye awam palatasi pelestin komitéti bashliqi muhemmed jemil ezzehrawi we uning hemrahliqidiki wekiller ümiki bilen körüshti.

numan qurtulmush uchrishishtiki sözide pelestin dewasigha ige chiqishning aldinqi qatardiki siyasiy xizmetlirining biri ikenlikini eskertip: «bu yalghuz türkiye üchünla emes, islam hemkarliq teshkilatigha eza barliq döletler üchün we barliq zulumgha uchrighan xelqlerning sépide turuwatqan hökümetler üchünmu muhim insaniy burchtur» dédi.

u, özlirining wezipisining pelestin mesilisini qaytidin islam dunyasining birinchi nomurluq küntertipige aylandurush we xelqara sehnide pelestin dewasigha hemdem bolidighan barliq dost we ittipaqdashlarning sanini küpeytishtin ibaret ikenlikini éytti.

u sözini dawamlashturup: «pelestin dewasigha ige chiqish arqiliq dunyawi menide insanperwerlik we adalet fironti teshkil qilalaymiz. quddus dewasi bizge nisbeten bir siyasiy dewadinla ibaret emes, imanimiz we étiqadimizning telipidur. quddusqa, mesjidi eqsagha we quddusning u shereplik ornigha adaqqiche ige chiqish iradimiz qetiydur» dégenlerni qeyt qildi.