aqardin amérika we girétsiyege ochuq signal

türkiye awazi radiyosi xewiri: dölet mudapie ministiri xulusi aqar, «18 – mart shéhitlirini xatirilesh küni» we «chanaqqele zepiri» ning 106 – yilliqi munasiwiti bilen, ministirliq binasida ötküzülgen murasimgha qatnashti, hemde bu yerde qilghan sözide, barliq dost we ittipaqdash döletlerdin, insaniy qimmetlerge ehmiyet béridighan barliq küchlerdin, térrorizmgha qarshi küchlük pozitsiye tutushi we ortaq irade ipadilishini kütüwatqanliqlirini tekitlep mundaq dédi: «amérika qoshma ishtatlirining térrorluq teshkilati daéshqa qarshi küreshni bahane qilip, bölgünchi térrorluq teshkilati p k k/y p g ni qollishini toghra, dep qarimaymiz, chünki, p k k dégenlik, y p g dégenliktur, derweqe, bularning bir - biridin héchqandaq perqi yoqtur.»

jumhur reis rejep tayyip erdoghanning yolyoruqlirigha asasen, süriye we iraqning shimalida hem sherqiy aqdéngizda eziz türkiye xelqining heq – hoquqliri we tüp menpeetlirini jan tikip qoghdawatqanliqlirini eskertken aqar, mundaq dep körsetti: «ezerbeyjan we liwiyeni öz ichige alghan köngül jughrapiyemizdiki dost, ittipaqdash, qérindash, mezlum we naheqchilikke uchrighan milletler bilen birlikte, depsende qiliniwatqan pütkül insaniy qimmetlerni qoghdash yolidimu küresh qiliwatimiz.»

ministir aqar, sherqiy aqdéngiz we qibristiki saqliniwatqan mesililerningmu diyalog arqiliq hel qilinishining zörürlükige chin dilidin ishinidighanliqlirini we buning üchün nahayiti zor tirishchanliq körsitiwatqanliqlirini tekitlep mundaq dédi: ««girétsiyening ighwagerchilik qilish meqsitide élip barghan herbiy manéwirliri, kélishimge xilapliq qilip, gheyriy herbiy salahiyetke ige arallarni qorallandurushi, bu arallarni chet el urush paraxotlirigha échishi, xelqara qanungha xilap halda chong quruqluq dewasi qilishi, ege déngizi we sherqiy aqdéngiza eqilge sighmaydighan telepliri, tebiiy rewishte jiddiylikni ewj alduruwetmekte, bundaq ighwagerchilik heriketliri we tehditlerni qobul qilghili bolmaydu, mesililerni hel qilishta  bundaq usullarning héchqandaq paydisi yoq. shunga, bundaq usullar arqiliq héchqandaq ünüm hasil qilghili bolmaydighanliqinimu hemme bilishi kérek.»