chawushoghlu qatar emiri we tashqi ishlar ministiri bilen körüshti

türkiye awazi radiyosi xewiri: tashqi ishlar ministiri mewlüt chawushoghlu twittérda uchur hembehirlep, qatar emiri sheyx temim bin hamed alsani bilen körüshüp, jumhur reis rejep tayyip erdoghanning salimini yetküzgenlikini bildürdi.

u: «qatar pars qoltuqi kirizisidin küchlengen halda chiqti. sheyx temim bin hamed alsanini bu musapidiki rehberliki sewebidin tebrikliduq» dédi.

tashqi ishlar ministiri mewlüt chawushoghlu qatar tashqi ishlar ministiri muhemmed bin abdurrahman alsani bilenmu körüshti.

u körüshüshtin kéyin ötküzülgen muxbirlarni kütüwélish yighinida, türkiye-qatar otturisisiki munasiwetlerning künséri küchiyip tereqqiy qilghanliqini qeyt qildi.

u türkiyening, qatar bilen pars qoltuqi döletliri otturisidiki normallishish musapisini memnunluq bilen qarshi alghanliqini xatirilitip, pars qoltuqi rayonining muqimliqi, bixeterliki we parawanliqini, özining muqimliqi we parawanliqi süpitide köridighanliqini bildürdi.

u mundaq dédi:

«bizmu türkiye bolush süpitide, rayondiki döletler bilen köp tereplik munasiwetler sewiyeside, yaki pars qoltuqi hemkarliq kéngishi qatarliq méxanizmlar arqiliq rayonluq teshkilatlar bilen munasiwetlirimizni téximu ilgirilitishni xalaymiz.»

u ikki döletning rayondiki mesililerni tinchliq usulda hel qilish üchün mürini mürige tirep xizmet qilghanliqini bildürdi.