chawushoghlu kuweytte al anda gézitining soallirigha jawab berdi
tashqi ishlar ministiri mewlüt chawushoghlu türkiye shirketlirining kuweytte muweppeqiyetlik layihelerni emelge ashurghanliqini bildürüp: «türkiye shirketliri kuweytning 2035-yilliq tereqqiyat nishani dairiside mesuliyetlerni üstige élishqa teyyar» dédi.
türkiye awazi radiyosi xewiri: türkiye tashqi ishlar ministiri mewlüt chawushoghlu xizmet ziyariti dairiside yétip barghan kuweytte, «al anda géziti» ning ziyaritini qobul qilip, soallargha jawab berdi.
u: «qérindash kuweyt bilen intayin yaxshi munasiwetlirimiz bar. ikki terep munasiwetlirimiz intayin yaxshi bolup, sistémilashqan» dédi.
u kuweytning pars qoltuqi kirizisini hel qilishta aktip rol oynighanliqini bildürüp: «türkiye kuweytnining rayonluq toqunushlardiki muressechilik rolini, diyalog we özara chüshishnish yoli bilen tinchliqni we bixeterlikni dawamlashturush mesilisidiki ornini teqdirleydu, shundaqla intayin qedirleydu» dédi.
u kuweyttin kéyin, umman bilen qatarni ziyaret qilidighanliqini bildürüp: «deslepte kuweytni ziyaret qilish, pars qoltuqi mesilisi nuqtisidin éytqanda simwolluq ehmiyetke ige. kuweytning, qatar bilen ereb töt terep otturisidiki ixtilaplarni axirlashturushqa qoshqan töhpisini teqdirleymiz. kuweyt rayondiki, yaxshi sot, tinchliq we hemkarliqlarning ülgisi hésablinidu. kuweytning tirishchanliqliri pars qoltuqi ixtilaplirini toluq we keng dairide hel qilish üchün ijabiy muhit yaratti. pars qoltuqi kirizisini arqida qaldurghinimizgha qarighanda, barliq pars qoltuqi rayoni bilen hemkarliqlirimizni kücheytishke we kuweytning ghayiwi rehberlikining mehsulati bolghan pars qoltuqi hemkarliq kéngishi bilen istratégiyelik shériklikimizni tereqqiy qildurushqa teyyarmiz» dédi.
u türkiye shirketlirining kuweytte nurghun muhim we simwolluq menige ige layihelerni emelge ashurghanliqini eskertip: «kuweytning 2035-yilliq tereqqiyat nishani dairiside, mesuliyetlerni üstige élishqa teyyar» dédi.
u bezi ereb döletliri bilen isirailiye otturisidiki normallishish musapisi üstide toxtilip: «bu namdiki normallishish kélishimliri toghrisidiki endishelirimizni otturigha qoyduq. chünki bu kélishimlerning b d t qararliridin orun alghan, ikki döletlik hel qilish charisini we uzun waqittin buyan dawamlishiwatqan toqunushlarni hel qilish üchün ornitilghan xelqaraliq qaide-pirinsiplarni ajizlitish yoshurun küchige ige ikenlikige ishinimiz» dédi.
u yuqirida tilgha élinghan kélishimlerning imzalinishining, 2002-yilidiki ereb tinchliq kélishimining asasi bolghan «tinchliq üchün zémin» we «normallishishtin kéyin tinchliq» pirinsiplirigha zit ikenlikini tekitlidi.
