dölet mudapiemizning dairisini tor wetinimizning sahesigiche kéngeytimiz

türkiye awazi radiyosi xewiri: jumhur reis erdoghan, milliy saraylar orgini teripidin istanbuldiki dolmabahche sariyining shahzade bashqarmisida ötküzülgen, resim – heykel muzéyining rémunt xizmiti tamamlanghandin kéyin, muzéyni qayta ishqa kirishtürüsh murasimida qilghan sözide, mundaq dédi: «herqaysi xelqlerning esli bayliqi ularning medeniyetke qoshqan töhpiliri bilen ölchilidu. yéqindin buyan <selchuqiylar döliti we osmanli impériyesining mirasilirining zamaniwi namayendisi> déyishke bolidighan yéngiche binakarliq uslubini dölitimizde kek omumlashturushqa tirishiwatimiz. dunyada siyasiy we iqtisadiy küch tengpungluqliri qaytidin shekilliniwatqan bir dewrge qedem qoyuwatqan shu künlerde, hemmidin bekrek ehmiyet bérishimizge tégishlik xususlarning medeniyet, maarip we aile ikenlikige ishinimen. nöwette herqaysi döletlerning igilik hoquqliri fizikiliq chégra liniyeliridinmu bekrek digital dunyada hujum astida turmaqta. hazir yéngi bir dewr bashlinish aldida turuwatidu. bu dewrning ismi <digital dewr> dur. shunga, digital wetenni qoghdashning bir teripide téxnikiliq qurulma bolsa, yene bir teripide, mezmun ishlepchiqirish bardur.»

wetenni qoghdash dairisini hem déngizda kök weten süpitide, hemde digital dunyada tor muhiti astidiki wetenni öz ichige alidighan shekilde kéngeytidighanliqlirini eskertken jumhur reis erdoghan, mundaq dep körsetti: «aldimizdiki mezgilde tor muhiti astidiki wetenni, hem téxnikilik qurulmimizni kücheytidighan hemde ilhamini öz medeniyitimizdin alidighan mezmun ishlepchiqirishimizni ashurghan halda qoghdash iradimiz qetiydur.»

yéqindin buyan türk téléwiziye tiyatirlirining dunya miqyasida qizghin alqishqa érishiwatqanliqi toghriliqmu toxtalghan erdoghan, mundaq dédi: «milliy tariximiz we medeniyitimizni eks ettüridighan téléwiziye tiyatirlirimiz dunyaning herqaysi jaylirida yaqturup körülüwatqan bolsa, bumu bizning toghra yolda algha ilgirilewatqanliqimizning namayendisidur.»