erdoghan: «wuxen wirusi» gha qarshi küresh tedbirlirini qollinishqa mejburmiz

türkiye awazi radiyosi xewiri: jumhur reis erdoghan, istanbulda küntertipke alaqidar mesililer heqqide élan qilghan bayanatida, «wuxen wirusi» gha qarshi küresh tedbirliri toghruluq toxtilip mundaq dédi: «sehiye ilmiy kéngesh heyitimiz her jehettin teyyarliq xizmetlirini ishlewatidu. maska, ijtimaiy musape we taziliq bizge nisbeten nahayiti muhim. buninggha diqqet qilmighanda, yuqumning tarqilishidin saqlanghili bolmaydu. shunga, <wuxen wirusi> gha qarshi küresh tedbirlirini qollinishqa mejburmiz hem qollinimiz. fizikiliq ul eslihe qurulmisi jehettin héchqandaq qiyinchiliqimiz yoq, doxturxana nuqtisidimu shundaq. <wuxen wirusi> bilen yuqumlanghuchilar  we qaza qilghanlar sanining köpiyip kétishi, bu basquchta bizni azablighan eng échinishliq menziridur.»

«wuxen wirusi» waksinisi toghriliqmu tetqiqat xizmetliride téz sürette ilgirilesh körülgenlikini eskertken jumhur reis erdoghan, mundaq dep körsetti: «waksina import qilish toghrisida uchrishishlar élip bériliwatidu. jümlidin, men bu heqte rusiye pirézidénti hörmetlik wiladimir putin ependim bilen söhbetleshtim. sehiye ministirliqimiz xitay sehiye ministirliqi bilen körüshti.»

bayliq fondi toghriliqmu toxtalghan jumhur reis erdoghan, mundaq dédi: «bayliq fondining resmiy mesuli men bolimen. ilgiriki qararlirimizni buningdin kéyinki basquchta ijra qilimiz. aldimizdiki mezgilge qarita bayliq fondini yer shari xaraktérlik menide téximu özgiche sewiyege yetküzüshni pilanlawatimiz. qatar emiri sheyx temim bin hemed alsanining türkiye ziyariti bu heqte tashlanghan qedemlerdin biridur. derweqe, bu dairide türlük kélishimlermu imzalandi.»

jumhur reis erdoghan, qaradéngizni marmara déngizigha tutashturidighan «qanal istanbul» layihesi toghriliqmu melumat bérip, mundaq dédi: «<qanal istanbul> layihesining binakarliq qismi teyyardur. téxnikiliq qisimlirimu shundaq. emdi nöwet layiheni höddige bérishke keldi. bu layihege meblegh sélish xizmetliri toxtap qalghini yoq. derweqe, meblegh sélish xizmetlirimiz üzlüksiz dawamlishiwatidu. meblegh séliniwatqan layiheler arisida, <qanal istanbul> layihesi aldinqi qatarda turidu.»

u yene, «qanal istanbul» layihesi arqiliq istanbulning adettin tashqiri derijide özgiche bir xil menzirige we xelqaraliq menidimu téximu alahide bir xil jezbidarliq küchke érishidighanliqinimu sözlirige ilawe qildi.