«erméniye yene kélishimge xilapliq qilsa éghir bedel töleydu»
dölitimiz tashqi ishlar ministiri mewlüt chawushoghlu erméniyening yene urush toxtitish kélishimige xilapliq qilsa éghir bedel töleydighanliqini éytti.
türkiye awazi radiyosi xewiri: chawushoghlu, ezerbeyjanning paytexti bakuda ötküzgen axbarat élan qilish yighinida mundaq dédi: «qehriman ezerbeyjan armiyesini, qérindash ezerbeyjan xelqini we pirézidént ilham eliyéwni tebrikleymen. sahediki zeperdin kéyin, ezerbeyjan – rusiye – erméniye otturisida urush toxtitish kélishimi imzalandi. shuni alahide tekitlep ötimenki, her qétim hujum qilghan, urush toxtitish kélishimini buzghan terep erméniye boldi. ezerbeyjan kirizisning diplomatik yollar arqiliq hel qilishni xalaydighanliqini herdaim namayen qildi.»
ministir chawushoghlu, nutiqida, firansiyening erméniyeni qollash arqiliq tinchliq tirishchanliqlirigha ziyan yetküzüshke teshebbus qilghanliqini tekitlep mundaq dédi: «üch dölettin teshkil tapqan minisk guruppisining, bolupmu firansiyening bu basquchtin achchiq sawaqlarni yekünlishi shert. chünki ular urush toxtitish kélishimi hasil qilinghandin kéyinmu terepbazliq xaraktérlik bayanatlarni élan qiliwatidu. urush toxtitish kélishimige erméniye bash ministiri imza qoydimu? qoydi. bu erméniye üchün küchke ige bolup, eger erméniye kélishimge xilapliq qilsa, éghir bedel töleydu.»
türkiyening rusiye bilen birleshke közitish merkizi qurush mesilisidimu pütüshkenlikini qeyt qilghan chawushoghlu, mundaq dep körsetti: «buninggha munasiwetlik axirqi höjjet dölet mudapie ministiri xulusi aqar bilen rusiye dölet mudapie ministiri sérgéy shoygu teripidin imzalandi. kélishimnamide, rusiyening oynawatqan roligha ehmiyet bériwatimiz. rusiyedin ete kélidighan heyet bilen tepsiliy söhbet ötküzimiz. merkezning paaliyetlirige alaqidar tepsillatlar etiki yighinda mueyyenlishidu. rusiyening roli qandaq bolsa, türkiyeningkimu shundaq bolidu. kontrol qilish we közitish merkizi muhim paaliyetlerni élip baridu. jümlidin, nazaret qilish, közitish hemde kélishimge xilapliq qilish ehwalliri körülgende tekshürüp bir terep qilish qatarliq paaliyetlerni élip baridu. urush toxtitish kélishimining uzaq mezgillik bolushigha tilekdashmiz. ezerbeyjan qandaq xalisa, shu boyiche ezerbeyjanni qollashni dawamlashturimiz.»
