shentop, chawushoghlu, qalin we altun wiyénnada yüz bergen térrorluq hujumini eyiblidi
türkiye büyük millet mejlisi bashliqi shentop, tashqi ishlar ministiri chawushoghlu, jumhur reislik sariyi bayanatchisi qalin we jumhur reislik sariyi uchur - alaqe ishliri idarisining bashliqi altun wiyénnada yüz bergen térrorluq hujumini eyiblidi.
türkiye awazi radiyosi xewiri: türkiye büyük millet mejlisi bashliqi mustafa shentop awstriyening paytexti wiyénnada yüz bergen térrorluq hujumini qattiq eyiblidi.
shentop, ammiwi ortaqlishish tor bétidiki sehipiside bu heqte élan qilghan bayanatida, mundaq dédi: «bu kéche wiyénnada yüz bergen térrorluq hujumini qattiq eyibleymen. qaysi shekilde we qandaq meqsette élip bérilsa bérilsun, puqralar nishan qilinghan herqandaq shekildiki zorawanliq weqesi térrorizmdur, insaniyetke qarshi jinayettur. shuni alahide tekitlep ötimenki, térrorizmgha qarshi küreshte xelqaraliq hemkarliq ornitish qetiy sel qarashqa bolmaydighan bir mejburiyetke aylandi.»
dölitimiz tashqi ishlar ministiri mewlüt chawushoghlu, ammiwi ortaqlishish tor béti Twitter sehipiside élan qilghan bayanatida, wiyénnada térrorizmning qarangghu yüzini yene bir qétim körsetkenlikini tekitlep mundaq dédi: «térrorizm pütkül insaniyetning ortaq düshminidur. bu balayiapetke qarshi semimiy bir xelqaraliq hemkarliq ornitishqa toghra kélidu. bu musibetlik künde awstriye xelqining yénidimiz.»
jumhur reislik sariyi bayanatchisi ibrahim qalin, ammiwi ortaqlishish tor béti Twitter sehipiside élan qilghan bayanatida, awstriyening paytexti wiyénnada yüz bergen térrorluq hujumini eyiblep mundaq dédi: «wiyénnada yüz bergen térrorluq hujumini qattiq eyibleymiz. bu qebih hujumda hayatidin ayrilghanlarning yéqin - yoruqlirigha teziye bildürimiz, aile tawabiatlirigha sewr - taqet tileymiz. her xil shekildiki térrorizmgha qarshi awstriyening yénidimiz. térrorizm balasigha qarshi kürishimizni adaqqiche qetiy dawamlashturimiz.»
jumhur reislik sariyi uchur - alaqe ishliri idarisining bashliqi fahrettin altunmu, ammiwi ortaqlishish tor béti Twitter sehipiside élan qilghan bayanatida, wiyénnada yüz bergen térrorluq hujumini eyiblep mundaq dédi: «wiyénnada yüz bergen térrorluq hujumini qattiq eyibleymen. hujumda hayatidin ayrilghanlargha teziye bildürimen, yarilanghanlargha shipaliq tileymen. türkiye térrorizmgha qarshi awstriyening yénididur. derd – elemliringlarni ortaqlishimiz.»
