qibris, ezerbeyjan, awstraliye we qirghizistan qatarliq ellerde jumhuriyet bayrimi tebriklenmekte

türkiye awazi radiyosi xewiri: shimaliy qibris türk jumhuriyitining paytexti lefkoshadiki atatürk xatire sariyida atatürk meqberesige tertip boyiche gülchembirek qoyush bilen bashlanghan murasim, hörmette turush we istiqlal marshigha tengkesh qilinip bayraqlarning chiqirilishi bilen dawamlashti.

murasimgha, shimaliy qibris türk jumhuriyiti jumhur reisi ersin tatar, parlamént bashliqi teberrüken uluchay, türkiyening lefkosha elchisi eli murat bashcheri, ministirlar, parlamént ezaliri, herbiy dairiler, siyasiy partiyelerning rehberliri we wekilliri, bashqa dairiler we puqralar qatnashti.

dölet miqyasida 29 – öktebir jumhuriyet bayrimini tebriklesh paaliyetliri kün boyi dawamlishidu.

türkiyening baku elchixanisida 29 – öktebir jumhuriyet bayrimini tebriklesh murasimi ötküzüldi.

murasimgha, türkiyening baku elchisi erkan özoral, herbiy ishlar meslihetchisi général mayor ismail haqqi köseeli, shimaliy qibris türk jumhuriyiti baku wekili nöwber ferit wechhi, elchixana meslihetchisi we xadimliri qatnashti.

özoral, ghazi mustapa kamal atatürkning rehberlikide qazinilghan «azadliq urushi» zepirini cheksiz iptixarliq tuyghusi ichide tebriklewatqanliqlirini éytti.

türkiye jumhuriyiti qurulghanliqining 97 – yilliqi, awstraliyening paytexti kanbérra, sidnéy we mélburnda ötküzülgen murasimlar arqiliq tebriklendi.

türkiyening kanbérra elchixanisi,  sidnéy we mélburn bash konsulxanilirida, 29 – öktebir jumhuriyet bayrimi munasiwiti bilen tebriklesh murasimliri ötküzüldi.

paytext kanbérra we sidnéydiki atatürk xatire saraylirigha gülchembirek qoyuldi, istiqlal marshi oquldi we hörmet turuldi.

«wuxen wirusi» yuqumi sewebidin cheklik salna kishi qatnishalighan mélburn fédératsiye meydanida ötküzülgen murasimda, istiqlal marshigha tengkesh qilinip türkiye bayriqi chiqirildi.

qirghizistanda jumhuriyet bayrimi, türkiye jumhuriyitining bishkek elchixanisi we qirghizistan – türkiye manas uniwérsitétining hemkarliqida torda ishqa ashurulghan «29 – öktebir jumhuriyet bayrimi mexsus pirogrammisi» arqiliq tebriklendi.

pirogramma, türkiyening bishkek elchixanisi telim - terbiye meslihetchilik bashqarmisigha qarashliq mekteplerning  oqutquchi – oqughuchiliri, elchixana xadimlirining perzenliri, qirghizistan – türkiye manas uniwérsitétining mudiri, ustazliri we xizmetchi – xadimlirining baliliri oqughan, hemde manas uniwérsitéti  güzel senet fakultéti oqutquchiliri türk muzika chalghuliri bilen teyyarlighan istiqlal marshining oqulushi bilen bashlandi.

istiqlal marshidin kéyin jumhur reis rejep tayyip erdoghanning jumhuriyet bayrimi bayanati élan qilindi.

qirghizistan – türkiye manas uniwérsitéti «manasning qizliri ussul ömiki» ning «türk xelq usulliri» ning orunlinishidin kéyin,  güzel senet fakultéti teripidin teyyarlanghan «jumhuriyet konsérti» bilen pirogramma axirlashti. pirogrammining mexsus yépilish bölümidin «qarabagh» namliq nomur orun aldi.