enqere kanadagha naraziliq bildürdi

türkiye awazi radiyosi xewiri: türkiye tashqi ishlar ministirliqi teripidin, erméniyening ishghal astidiki taghliq qarabagh rayonida dawamlishiwatqan toqunushlarda ishlitilgenliki dewasi bilen, kanadaning bir qisim herbiy téxnologiyeler üchün türkiyege bergen éksport ruxsitini waqitliq toxtatqanliqigha alaqidar yazma bayanatta mundaq déyildi: «mushu esirdiki eng chong insaniy tiragédiyelerdin birini bashtin kechürüwatqan yemendiki kirizisqa daxil boluwatqan döletlerge qoral – yaraghlarni éksport qilishtin qilche ayanmaywatqan, hemde birleshken döletler teshkilati mutexessisliri teripidin teyyarlanghan doklatlardimu tenqid qiliniwatqan bu qoral – yaraghlarni sétishni rayonluq bixeterlikke hesse qoshush  dewatqan kanadaning, shimaliy atlantik ehdi teshkilatidiki bir ittipaqdishigha mudapie sanaiti mehsulatlirini éksport qilishni cheklishining héchqandaq izahati yoqtur.»

bayanatta, kanadaning ezerbeyjanning uda 30 yildin buyan erméniyening ishghaliyiti astidiki zéminlirini azad qilish üchün qiliwatqan heqqaniy kürishini seweb körsitip, bir qisim herbiy mehsulatlarning türkiyege éksport qilinishining tonglitipm qoyulushigha munasiwetlik bayanatning, kanadaning qosh ölchemlik pozitsiyesining namayendisi ikenliki tekitlinip mundaq déyildi: «kanadaning bolupmu türkiyening <tinchliq buliqi> herbiy herikiti qozghighan mezgildin buyan, ittipaqdashliq rohigha xilap halda, türkiyege qarita herbiy lazimetliklerni éksport qilishqa ruxset qilish mesiliside türlük tosalghularni peyda qilishi we hemkarliqtin yiraq pozitsiye tutushi diqqet qozghimaqta. halbuki, türkiye keng dairilik éksport kontrol tüzümlirige ige bir dölet bolup, bu tüzümlerge asasen öz mesuliyitini sezgürlük bilen ada qilmaqta. kanadadin kütidighinimiz, qosh ölchemlerdin xaliy diplomatiye siyasitini yolgha qoyushi, kanadadiki türkiyege öchmenlik qilidighan küchlerning tesirige uchrimastin, hemde tar ramkiliq siyasiy menpeetler patqiqigha pétip qalmastin heriket qilishidur.»