erdoghanning tenqidliri israiliye elchisige yighin zalini terk ettürdi

türkiye awazi radiyosi xewiri: israiliyening birleshken döletler teshkilatida turushluq daimiy wekili gilad érdan, sin arqiliq ishtirak qilghan jumhur reis rejep tayyip erdoghan, birleshken döletler teshkilatining 75 – nöwetlik omumiy kéngesh yighinida, israiliyening pelestinge qaratqan «bésim, zorawanliq we qorqutush siyasetliri» toghruluq toxtiliwatqanda, yighin zalidin ayrildi.

erdoghan, nutiqining mezkur bölümide, mundaq dégenidi: «üch chong dinning muqeddes qimmetlirige sahibxaniliq qilghan quddusning mehremiyitige sozulghan nijis qol, jasaritini barghanséri zoraytmaqta. pelestin xelqi israiliyening barliq bésimliri, zorawanliqliri we qorqutush siyasetlirige qarshi uda yérim esirdin köprek waqittin buyan tirkeshmekte. <yüz yilning kélishimi> nami astida pelestin terepke téngilmaqchi bolghan tiz püküsh höjjiti ret qilinghan haman, israiliye bu qétim hemkarlashquchilirining yardimige tayinip, qaytidin qeleni ichidin pethi qilish teshebbuslirini tézleshtürdi. biz, pelestin xelqi razi bolmaydighan héchqandaq bir pilanni qollimaymiz. bir qisim rayon döletlirining bu suyiqestlik oyungha ortaq bolushining, israiliyening asasliq xelqaraliq paramétirlarni yoqitish tirishchanliqlirigha xizmet qilishtin bashqa uqumi yoqtur. birleshken döletler teshkilatining qararliri we xelqara qanungha xilap halda quddusta elchixana échish niyetlirini bayan qilghan döletler, bu pozitsiyeliri arqiliq peqet ixtilapning téximu murekkepliship kétishigila xizmet qilidu, xalas. pelestin mesilisi, peqet 1967 – yilqi chégra liniyeliri asasida, paytexti sherqiy quddus bolghan musteqil, igilik hoquq we jughrapiyelik izchilliq ichide bir pelestin dölitining qurulushi arqiliqla hel qilinishi mumkin. buningdin bashqa hel qilish charisi izdesh bihude awarichiliqtur, terepbazliqtur we adaletsizliktur.»