erdoghan: michotakis bilen körüshüshte mesile yoq
jumhur reis rejep tayyip erdoghan girétsiye bash ministiri kiryakos michotakis bilen körüshüshte mesile yoqluqini éytti.
türkiye awazi radiyosi xewiri: erdoghan, istanbulda jüme namizidin kéyin élan qilghan bayanatida, yer tewresh tetqiqat paraxoti «oruch reis» ning, sherqiy aqdéngizdiki tetqiqat paaliyetlirining waqtinche toxtitilip, antalya portigha chékindürülüshi heqqide toxtilip mundaq dédi: «<oruch reis> paraxotini kontrol üchün portqa chékindürgen bolsaq, buning bir uqumi bardur. diplomatiyege yéngi bir purset yaritip béreyli, dep shundaq qilduq. lékin, bu paraxotimizning kontrol üchün chékindürülüshi, bizning tamamen yer tewresh tetqiqatlirimizning toxtap qalghanliqidin dérek bermeydu. derweqe, paraxotimiz, kontrol tamamlanghan haman, wezipe ötesh ornigha qaytip, tetqiqatlirini eynen dawamlashturidu.»
michotakis bilen körüshüshte mesile yoqluqini tekitligen erdoghan mundaq dep körsetti: «néme toghruluq körüshimiz, qaysi ramka astida körüshimiz, esilide muhim bolghini mushu nuqtidur.»
erdoghan, türkiye – misir munasiwetliri toghruluq toxtilip mundaq dédi: «misir bilen axbarat sahesidiki uchrishishlar perqliq bolup, bu heqte héchqandaq mesile yoq, héchqandaq tosalghumu yoq, emma misirning girétsiye bilen kélishim tüzüshi bizni qattiq renjitti.»
liwiyediki özgirishler toghriliqmu toxtalghan erdoghan, mundaq dédi: «liwiyening sherqidiki qanunsiz qoralliq küchlerning rehbiri we herbiy isyanchi hefter, beribir meghlub bolidu, buning shundaqliqini hazirdin bashlapla körüwatimiz.»
