türkiye bilen hayti 7 türlük kélishim imzalidi
tashqi ishlar ministiri mewlüt chawushoghlu türkiye bilen hayti otturisida 7 türlük kélishim imzalanghanliqini bildürdi.
türkiye awazi radiyosi xewiri: chawushoghlu haytigha qilghan dölet ishliri ziyariti dairiside, mensepdishi klawud joséf bilen körüshkendin kéyin birleshme muxbirlarni kütüwélish yighini ötküzdi.
haytida tunji qétim ziyarette bolghanliqi we 7türlük kélishimni imzalighanliqi üchün intayin xursen ikenlikini eskertken chawushoghlu, qizghin kütüwalghanliqi we semimiy méhmandostluqi üchün mensepdishi joséfqa rehmet éytqandin kéyin, hayti pirézidénti jownél moys teripidin qobul qilinghanliqini bayan qildi, körüshüshte uninggha jumhur reis rejep tayyip erdoghanning eng yaxshi tileklirini yetküzgenlikini eskertish bilen bir waqitta, texminen 5 hepte ilgiri erdoghan bilen moysning téléfonda körüshkenlikini tekitlep mundaq dédi: «rehberlirimiz, ikki terep munasiwetlirimiz üchün muhim nishanlarni belgilidi, biz bu nishanlargha yétish üchün qedirlik mensepdishim klawud bilen hemkarlishimiz. munasiwetlirimizni imkaniyetning bariche barliq sahelerde, bolupmu iqtisadiy sahede tereqqiy qildurushni töt köz bilen kütüwatimiz.»
ministir chawushoghlu, joséf bilen élip barghan uchrishishida, énérgiye, qurulush, sijil énérgiye we bashqa xizmetler hem rayonluq layiheler toghriliqmu muzakirileshkenliklirini tekitlep mundaq dédi: «uchrishishta, her sewiyediki hemkarliqimizni yenimu qoyuqlashturush mesiliside ortaq tonush hasil qilduq. shuni alahide tekitlep ötimenki, ikki dölet otturisidiki özara ziyaretler üzlüksiz dawamlishidu. jumhur reisiz rejep tayyip erdoghan hayti pirézidénti moysni türkiyede kütüwélishtin intayin xursen bolidu. bu teklipni men sundum. menmu mensepdishim we qedirlik dostum klawudni türkiyede kütüwélishtin xursen bolimen.»
ziyaret dairiside, «tashqi ishlar ministirliqliri ara siyasiy kéngesh mixanizimining ornitilishigha alaqidar kélishim layihesi», «tashqi ishlar ministirliqliri diplomatiye akadémiyeliri ara hemkarliq kélishim layihesi», türkiye bilen hayti otturisida «apetni bashqurushqa munasiwetlik kélishim layihesi», «iqtisadiy hemkarliq kélishimi», «medeniyet hemkarliqi kélishimi», «arxip saheside hemkarliq kélishim layihesi» we «téxnika hemkarliq kélishim layihesi» imzalandi.
