ereb döletliride türkiyeni qollash herikiti bashlandi

türkiye awazi radiyosi xewiri: kuweytlik akadémik we ümmet partiyesining bashliqi piroféssor doktor hakim elmatayrini öz ichige alghan ereb döletliridiki nurghun kishi, «türkiyeni qolla», «türkiye sen yalghuz emes» we «musulmanlar türkiyeni qollaydu» dégendek xetküchler bilen bashlanghan seperwerlik herikitini qollidi.

türkiyede yashaydighan erebler teripidin qurulghan ereb-türk teshkilatliridin bashqa, ereb döletliridiki ijtimay teshkilatlarmu seperwerlik herikitini qollidi.

türkiyeni iqtisadiy jehettin qollash tekitlengen seperwerlik herikitide, «türkiyeni qollash, ümmetke yardem qilghanliq» dégen xetküch alahide diqqet qozghidi.

«nafizet iqtisad» (iqtisad penjirisi) namliq xewer bétining bashqurghuchisi émani muhemmed, her daim türkiyeni we türkiye hökümitini qollap kelgenliklirini eskertip, mezkur seperwerlik herikitinimu qollighanliqlirini qeyt qildi.

u ereb döletliridiki minglarche kishining türkiyediki iqtisadiy tereqqiyatqa heyran bolghanliqi üchün, bu dölette yashashni tallighanliqini bildürüp: «türkiye yéqinqi yillarda daim mezlumlarni qollaydighan dölet bolush süpitide aldinqi orungha chiqti» dédi.

enes telfuh twittérda: «türkiye her bir shereplik musulmanning yürikidin orun alghan. undaq bolsa, barliq musulmanlarning izziti bolghan türkiyeni qollash kérek» dédi.

heqning we türkiyening yénida ikenliklirini tekitligen sara elgamirimu twittérda: «biz toghrini qollishimiz kérek. toghrini qollash we zulumni yoqitish üchün türkiyeni qollaymiz» dédi.

twittérdiki «221 mustafa» isimlik kishi özining iraqliq ikenlikini bildürüp, musulmanlarning yénida bolghan muddette türkiyeni qollaydighanliqini tekitlidi.

yéqinqi mezgillerde, türkiyening sherqiy aqdéngizda duch kelgen bésimlar we türkiye iqtisadigha qilinghan hujumlar sewebidin türkiyeni yaxshi köridighan ereblerning mushundaq seperwerlik herikitini bashlighanliqi qeyt qilinmaqta.