erdoghan xiroshimadiki xatirilesh murasimigha tebrik widéosi ewetti

türkiye awazi radiyosi xewiri: 1945-yili 6-awghust yaponiyening xiroshima shehirige tashlanghan atom bombisi sewebidin jénidin ayrilghanlar we yarilanghanlar üchün sheherdiki tinchliq xatire baghchisida, xatirilesh murasimi ötküzüldi.

türkiye jumhur reisi rejep tayyip erdoghan murasimgha ewetken widéosida, xiroshimagha atom bombisi tashlanghanliqining, insaniyet tarixining eng qarangghuluq künliridin biri ikenlikini alahide tekitlidi.

u xiroshima qurbanlirigha teziye bildürüp: «dost yaponiye xelqige sewr tileymen. 75 yildin buyan yürekliridiki dertlirini yoqitishqa tirishiwatqan dertmenlerning yéqin-yoruqlirigha sewr tileymen» dédi.

u: «bu weqedin sawaq élishta muweppeqiyet qazinishqa mejburmiz. tinchliq xatire baghchisigha tiklengen abidege oyulghandek, xiroshima < xataliqni tekrarlimasliq> qetiy iradimizning nishanisi bolushi kérek» dédi.

u sheherge atom bombisi tashlanghanda ikki yashta bolghan we yarilanghandin kéyin 10 yil yashighan, xiroshimaning tesirige uchrighan balilarning simwoligha aylanghan sadako sasakini xatirilitip: «onlarche tiragédiyelerge qarimay, süriyede, yemende, pelestinde balilar dawamliq ölmekte we urushning barliq yükining azabini chekmekte. ölüm ularni musapir qolwaqlirida, mekteptiki chéghida, kochida we bezide özini eng bixeter hés qilidighan anilirining quchiqida tapmaqta. bu dertlerning yene bir qétim yüz bermesliki üchün, balilirimiz we ewladlirimiz üchün <yene bir qétim hergiz>» dédi.

u widéodiki sözini türkiye shairi nazim hikmetning «ishikinglarni chékimen, hede, tagha, imza qoyunglar. balilar öltürülmisun, ular kempüt yisun» dep axirlashturdi.

murasimgha, jumhur reis rejep tayyip erdoghangha wakaliten türkiyening tokyodiki bash elchisi hesen muratmerjan we uning hemrahliqidiki heyet qatnashti.