türkiye liwangha bughday yardem qilidu

türkiye awazi radiyosi xewiri: türkiye jumhuriyiti medeniyet we sayahet ministiri mehmet nuri ersoy, aldinqi küni béyrut portida meydangha kelgen partlashtin kéyin jumhur reis rejep tayyip erdoghanning yolyoruqigha asasen liwanning jarahetlirige melhem bolush yolida qedem tashlanghanliqini, bu dairide liwangha türkiye hemkarliq we koordinatsiye agénitliqi – tika arqiliq 400 tonnigha yéqin bughday ewetilidighanliqini uqturdi.

ministir mehmet nuri ersoy tiwittér adrésida uchur hembehrilep, liwanning paytexti béyruttiki partlighuch maddilar saqliniwatqan bir iskilatta meydangha kelgen partlashtin kéyin türkiyening bu döletke qilmaqchi bolghan yardemliri toghrisida melumat berdi.

u uchurida, «jumhur reisimiz rejep tayyip erdoghan janablirining yolyoruqigha asasen, dölitimiz liwanning jarahetlirini téngish üchün heriketke ötti. béyruttiki partlash netijiside bughday zapaslirining köp qismidin ayrilip qalghan liwangha türkiye yardem qolini sundi. tika 400 tonnagha yéqin bughdayni liwanliq emeldarlargha tapshurup béridu» dédi.

béyrut portidiki partlighuch maddilar saqliniwatqan 12 – nomurluq iskilatta aldinqi küni ot apiti yüz bergen, arqidin pütkül béyrutni zilzilige keltürgen intayin shiddetlik partlash yüz bergen, weqede 135 adem qaza qilghan, 5 mingdin artuq adem yarilanghanidi.

partlashta bughday ambarlirimu talapetke uchrighanidi؛ paytext béyrutta 2 heptilik jiddiy halet élan qilghan yuqiri derijilik mudapie kéngishi, bughday toluqlashni qarar qilghanidi.