türkiye girétsiyening ayasofya pozitsiyesige qattiq naraziliq bildürdi

türkiye awazi radiyosi xewiri: türkiye jumhuriyiti tashqi ishlar ministirliqi bayanatchisi hami aqsoy, girétsiyediki ayasofyai kebir jamii sherifning ibadetke échilishigha bolghan naraziliqlar toghrisidiki bir soalgha yazma halette jawab qayturup, girétsiyening naraziliq bildürüshni bahane qilip, islam we türkiye düshmenlikini yene bir qétim namayan qilghanliqini bildürgen halda «girétsiye hökümiti we parlamént ezalirining düshmenlerche bayanatliri arqiliq xelqni küshkürtüshlirini we shanliq türk bayriqining selanikte köydürülüshige ochuq – ashkara ruxset qilishini qattiq eyibleymiz» dédi.

ayasofyai kebir jamii sherifte yéngidin sejde qilinishqa bashlinishini qobul qilalmighan yawropaning erke perzentlirining yene bir qétim ümidsizlikke duchar bolghanliqini bildürgen aqsoy, «tarixtin tégishilik sawaqni almighan bu irqchi bashlar, shanliq bayriqimizgha bihörmetlik qilghanlar egediki aqiwitini yaxshi xatirilishi kérek. girétsiye, 567 yildin buyan oyghinalmighan wizantiye chüshidin emdi oyghinishi we buning harghinliqidin qutulushi kérek» dégenlerni qeyt qildi.

bayanatchi hami aqsoy, dölitidiki musulman türk az sanliqlargha ishletken bésimliri yawropa kishilik hoquq mehkimisining qararliri arqiliq jezmleshken, tewelikidiki tarixiy jamelerning yiqitilishigha köz yumghan, paytextide jame bolmighan birdinbir yawropa dölitining girétsiye ikenlikini xatiriletkendin kéyin sözini dawamlashturup, «milliy igilik hoquqidin paydilinishta héchbir dölet türkiyege ders bérelmeydu. türk millitining iradisige asasen ibadet qilishqa échilghan ayasofyai kebir jamii sherifi zéminlirimizdiki bashqa medeniyet bayliqlirimizgha oxshashla türkiyege tewe bolup, menggü igidarchiliqimizda we muhapizitimiz astida bolidu. ayasofyai kebir jamii sherifning ibadetke échilishi, 1972 – yilidiki b d t pen, maarip, medeniyet teshkilati – yunéskoning dunya medeniyet we tebiiy yadikarliqlirini qoghdash toghrisidiki kélishimning rohigha uyghundur. türkiyening barliq diniy heq we erkinliklerni qoghdash we epuchan enenisi dairiside, barliq dinlargha baghrini achqan tinchliq dini islamning ibadetxansii bolghan ayasofyai kebir jamii sherifi buningdin kéyinmu barliq kishilerge ochuq bolushni dawamlashturidu» dédi.