türkiye amérikaning diniy erkinlikler doklatigha naraziliq bildürdi

türkiye awazi radiyosi xewiri: türkiye jumhuriyiti tashqi ishlar ministirliqi bayanatchisi hami aqsoy, «amérika xelqara diniy erkinlik komitéti 2020 – yilliq doklati»ning türkiyege alaqidar qismi toghrisidiki bir soalgha yazma halette jawab qayturdi.

«xelqara diniy erkinlikler doklatliri» da türkiyege alaqidar bölümlerning «bir tereplime we obyéktipliqtin yiraq» halette qelemge élinishining her yili yüz béridighan adet tüsini alghan bir xil ehwal ikenlikini eskertken bayanatchi aqsoy, mezkur yazma jawabida, ««doklat ilgiriki yillardikige oxshash asassiz, éniqsiz, müjmel dewalarni öz ichige alghan bolup, yekke weqelerni diniy erkinlikke dexli- teruz qilish dep teswirleshke urunushlar bar. bu bir tereplime qarash we asassiz pozitsiye doklatning ishenchliklikige kölengge chüshürmekte» dédi.

u, «doklatta, fethullahchi térrorluq teshkilatining kattibishining <amérikada yashaydighan bir diniy zat> dep teriplinishi bolsa, türkiyede démokratiyege qarshi élip bérilghan xainlarche herbiy – siyasiy özgirish qozghash urunushi (2016 – yili 15 – iyul) ni we 251 bigunah puqraning shéhit qilinishini qesten körmeske sélishtin dérek béridu» dégenlerni qeyt qildi.

bayanatchi aqsoy, komitétning, dunyaning herqaysi jayliridiki diniy erkinlikke tehdit yüzlinishlerge orun bérishi kütülüwatqan bu doklatida, islam dinigha qarshi turush, dinniy asas qilghan kemsitish we chet ellik öchmenlikining gherb we amérikadiki köpiyishi toghrisida bir éghizmu söz qilinmasliqi bolsa, doklatning meqsitining diniy erkinlikler we heq – hoquqlarning muhapizet qilinishi emeslikini éniq otturigha qoyghanliqini bildürdi.

hami aqsoy bayanatida, «buningdin awwalmu islamgha qarita xata tonushqa ige bolush bilen eyiblengen mezkur komitétning, bu doklatni obyéktip ölchemlerdinmu bekrek, özining asassiz küntertip we aldinqi pilandiki ishlirigha asasen, türkiye düshmini tereplerning tesiri astida qelemge alghanliqi éniq. bu doklatni teyyarlighanlarning eynekke qarap özini tekshürüp körüshini tewsiye qilimiz» dégen ibarilerge orun berdi.