erdoghan؛ wabani kontrol qilishta muhim ilgirilesh hasil qilduq

türkiye awazi radiyo xewiri: jumhur reis rejep tayyip erdoghan ichki kabént yighinidin kéyin muhim bayanatlarni élan qildi.

u wabaning kontrol astigha élishta muhim ilgirileshlerning hasil qilinghanliqini bildürüp: «türkiye yolgha qoyghan tedbirliri bilen, wabani eng téz sürette kontrol astigha alghan döletlerning ichide aldinqi rettin orun alidu» dédi.

u buningdin burun sélinidighanliqini élan qilghan ikki doxturxanidin bashqa, istanbulning hamidköyde 100 karwatliq, derinjede 250 karwatliq yéngi doxturxanilarning bina qilinidighanliqini eskertip, bu doxturxanilarning kéyinki heptilerde xizmetke kirishtürülidighanliqini qeyt qildi.

u: «dölitimiz bu basquchta ijabiy yüzlinishke qarap ilgirilesh ichide. yuqumlinishni bayqashtin dawalashqiche yaxshi ehwalda turuwatimiz. héchqandaq kemchilikimiz yoq» dédi.

u wabagha qarshi turush dairiside, hepte axirliri kochigha chiqishni chekleshni kéyinki mezgillerdimu dawamlashturushni qarar qilghanliqlirini bildürüp: «bu künler ötüp ketkendin kéyin, hayatimizni téximu menilik we téximu güzel ötküzimiz» dédi.

u xelqara pul fondi teshkilati (IMF) toghrisida toxtalghanda: «xelqara pul fondi teshkilati pirogrammisini öz ichige alghan dölitimizni minnet astida qoyidighan her qandaq mejburlap téngishqa boyun egmeymiz» dédi.

u axirida, wabagha qarshi turush dairiside, türkiyening 34 döletke tibbiy lazimetlik yardemlirini ewetkenlikini we bu xil yardemlerning kéyinki künlerdimu dawamlishidighanliqini bildürdi.