erdoghan putin we zéléniski bilen téléfonda körüshti
jumhur reis rejep tayyip erdoghan rusiye pirézidénti wiladimir putin we ukraina pirézidénti wladimir zéléniski bilen ayrim - ayrim halda téléfonda körüshti.
türkiye awazi radiyosi xewiri: jumhur reislik sariyi uchur - alaqe ishliri bashqarmisining bildürüshiche, erdoghan bilen putnning téléfon söhbitide, «wuxen wirusi» gha qarshi küreshte hemkarlishish, ikki terep munasiwetliri we rayonluq özgirishler qatarliq mesililer heqqide muzakire élip bérilghan.
kirémil sariyining bildürüshiche, ikki rehberning téléfon söhbitide, «wuxen wirusi» gha qarshi küresh tedbirliri, türkiyediki rusiye puqralirining öz yurtigha qaytishi mesiliside hemkarliq ornitish qatarliq mesililer heqqide muzakire élip bérilghan. shuning bilen bir waqitta, idlib rayonining weziyitini tinjitish üchün 5 – mart küni ikki terep otturisida imzalanghan kélishim, süriyediki özgirishler, liwiyee mesilisi we türkiye – rusiye otturisidiki iqtisadiy hemkarliq qatarliq mesililer heqqide keng dairilik pikir almashturulghan. ikki rehber, oxshimighan sewiyelerde dawamliq uchrishishlarni élip bérish toghruluq ortaq tonush hasil qilghan.
jumhur reislik sariyi uchur - alaqe ishliri bashqarmisining bildürüshiche, erdoghan yene, ukraina pirézidénti wladimir zéléniski bilenmu téléfonda körüshken. téléfon söhbitide, «wuxen wirusi» gha qarshi küresh, ikki terep munasiwetliri we rayonluq mesililer heqqide muzakire élip bérilghan.
ukraina pirézidént mehkimisi teripidin bu heqte élan qilinghan yazma bayanatta eskertilishiche, erdoghan bilen zéléniskining téléfon söhbitide, pütkül dunyagha tesir körsitiwatqan «wuxen wirusi», her ikki dölet puqralirini qoghdash meqsitide qolliniliwatqan tedbirler qatarliq mesililer heqqide muzakire élip bérilghan. jumhur reis erdoghan zéléniskigha, ukraina türkiyedin telep qilghan nepeslinish üskünisi we alahide qoghdinish kiyimi mesilisi heqqide oylishidighanliqlirini éytqan.
