türkiye «wuxen wirusi» gha taqabil turush tedbirlirini kücheytti
pütkül dunyagha tesir körsitiwatqan «wuxen wirusi» gha qarshi küreshte ülge yaritiwatqan türkiyede buningdin kéyin tashlinidighan qedemlermu békitip chiqildi.
türkiye awazi radiyosi xewiri: jumhur reislik sariyi bayanatchisi ibrahim qalin, jumhur reislik sariyida jumhur reis rejep tayyip erdoghanning riyasetchilikide ministirlar we munasiwetlik orunlarning mesullirining ishtirak qilishida chaqirilghan «<wuxen wirusi> gha taqabil turush yighini» din kéyin élan qilghan bayanatida, yighinda, «wuxen wirusi» gha taqabil turush tedbirliri dairiside jumhur reis rejep tayyip erdoghanning chet el ziyaretlirini bir mezgil kéchiktüridighanliqini tekitlep mundaq dédi: «dölitimiz <wuxen wirusi> gha taqabil turush tedbirlirini kücheytti. bu dairide birinchidin, bashlanghuch, toluqsiz hem toluq ottura mektepler 16 – marttin bashlap bir heptilik tetilge qoyup bérilidu, 23 – marttin étibaren oqughuchilirimizgha yiraq musapilik oqutush usuli arqiliq intérnét we téléwiziye qanalliridin oqush sharaiti yaritip bérilidu. ikkinchidin, uniwérsitétlirimiz 16 – marttin étibaren 3 heptilik tetilge qoyup bérilidu. mutexessislerning tewsiyeliri, pikir – telepliri we türlük analizlargha asasen tenterbiye musabiqiliri aprélning axirlirighiche toxtitilidu.»
yene bir tereptin, sayahet ishliri ministirliqimu barliq senet xaraktérlik paaliyetlerning 14 – marttin bashlap aprélning axirlirighiche kéchiktürülgenlikini uqturdi.
«wuxen wirusi» gha taqabil turush tedbirliri dairiside memurlarning chet elge chiqishi meniy qilindi, alahide ehwallarda bolsa ruxset sorighandin kéyin chet elge chiqishi qararlashturuldi.
bu ariliqta, sehiye ministiri fahrettin koja, ammiwi ortaqlishish tor béti Twitter sehipiside élan qilghan bayanatida, türkiyede ilgiri «wuxen wirusi» bilen yuqumlanghan bir kishining yéqinidimu wirus bayqalghanliqini, shuning bilen, türkiyede «wuxen wirusi» bilen yuqumlanghanlar sanining ikkige yetkenlikini uqturdi.
