erdoghan: putin bilen körüshkendin kéyin idlibning aqiwiti éniq bolidu
türkiye jumhur reisi rejep tayyip erdoghan bügün (21-féwral) kech terepte rusiye pirézidénti wladimir putin bilen téléfonda körüshkendin kéyin, süriyening idlib rayonida qandaq heriket qilishning éniq bolidighanliqini éytti.
türkiye awazi radiyosi xewiri: jumhur reis rejep tayyip erdoghan jüme namizidin kéyin, istanbulda muxbirlarning soallirigha jawab berdi.
u idlibtiki weziyetke «urush» dep baha berdi we mundaq dédi:
«putin bilen téléfonda körüshimen. hazirdin bashlap idlibta barliqqa kelgen barliq özgirishlerni muzakire qilimiz. beshshar esed hakimiyiti ilib xelqige zulum qilishni toxtatmighan teqdirde, biz u yerdin chékinmeymiz. urush toxtitishni peqet mushu usulda emelge ashuralaymiz» dédi.
u tünügünki ikki türkiye eskiri shéhit bolghan hujumgha hessilep jawab bérilgenlikini, 150 ke yéqin beshshar esed hakimiyiti eskirining bir terep qilinghanliqini, 12 tanka, üch herbiy aptomobil, 14 yiraq musapiliq zembirek we ikki dane qoral onitilghan pikapning pachaqlinip tashlanghanliqini bildürdi.
u bügün firansiye pirézidénti makron we gérmaniye bash ministiri mérkél bilen téléfonda körüshkenlikini we ularning istanbulda rusiye pirézidénti putinmu qatnashqan besh terep yighini ötküzüshni teklip qilghanliqini bildürüp: «putin téxi ulargha kütkendek jawabni bermidi. bügün kechtiki körüshüshimizde xeyrilik qedem tashlighan bolushimizni ümid qilimen. beshshar esed hakimiyiti ilib xelqige zulum qilshni toxtatmighan teqdirde, biz u yerdin chékinmeymiz. urush toxtitishni peqet mushu usulda emelge ashuralaymiz. bixeter rayonda yéngi qedem tashliduq» dédi.
