enqere misirning diplomatiye wekilini ministirliqqa chaqirtip naraziliqini yetküzdi

türkiye awazi radiyosi xewiri: diplomatik menbelerdin igilengen uchurgha asaslanghanda, anadolu agéntliqining qahire ishxanisi xizmetchilirining nazaret astigha élinishidin kéyin tashqi ishlar ministirliqigha chaqirtilghan misirning enqerede turushluq diplomatiye wekilige türkiyening naraziliqi yetküzülgen.

türkiye bilen misir arisidiki diplomatik munasiwetler 2013 – yilidin buyan özara diplomatik wekil turghuzush sewiyeside dawamlashturulmaqta.

misir saqchiliri tünügün anadolu agéntliqining qahirediki ishxanisigha basturup kirip, biri türkiye puqrasi bolup jemiy 4 xizmetchini nazaret astigha élip namelum bir jaygha élip ketkenidi.

ishxanigha saet 18:00 etrapida kirgen misir saqchiliri, amanliq kaméralirini taqap, intérnétni taqiwetkendin kéyin etigengiche ishxanini tekshürgen, xizmetchilerning pasport, yanfon we kompyotérlirini tartiwélip sirt bilen alaqe ornitishigha tosqunluq qilghanidi.

misir saqchiliri weqedin kéyin ishxanigha barghan anadolu agéntliqi adwokatigha tekshürüsh sewebi toghrisida melumat bérishni ret qilghanidi.

anadolu agéntliqi we türkiyening qahirediki elchixanisining adwokatliri, muxbirlarning némishqa nazaret astigha élinghanliqi we qeyerge élip kétilgenliki toghrisida misir dairiliridin melumat telep qilghan bolsimu hazirghiche héchqandaq jawabqa érishelmidi.