chawushoghlu: sulaymanining öltürüshi rayonimiz üchün xewp shekillendürdi

türkiye awazi radiyosi xewiri: chawushoghlu «türkiyening 2019 – yilliq diplomatiye siyasiti xulase yighini» da qilghan sözide mundaq dédi: «bu kirizisning hel qilinishi yaki sürkilishning azaytilishi üchün aldimizdiki künlerdimu bashqa döletler bilen birlikte tirishchanliq körstishni dawamlashturimiz.»

barliq terepler bilen qoyuq alaqe ornitip kéliwatqanliqlirini eskertken chawushoghlu, jumhur reis rejep tayyip erdoghanning firansiye pirézidénti émmanuél makron, iran pirézidénti hesen ruhani, iraq pirézidénti berhem salih we qatar emiri sheyx temim bin hemed alsani qatarliqlar bilen téléfonda körüshkenlikini, engliye bash weziri boris jonson, gérmaniye bash ministiri angéla mérkél we bashqa döletlerning rehberliri bilenmu aldimizdiki künlerde téléfonda körüshidighanliqini eskertish bilen bir waqitta, bu dairide öziningmu, iran tashqi ishlar ministiri muhemmed jewad zerif, rusiye tashqi ishlar ministiri sérgéy lawrow, engliye tashqi ishlar  weziri dominik raab, qatar tashqi ishlar ministiri sheyx muhemmed bin abdurrahman alsani, pakistan diplomatiye ministiri shah muhemmed qureyshi we birleshken döletler teshkilati bash katipi antonio gutérrés bilen ayrim – ayrim halda téléfonda körüshkenlikini qeyt qildi.

u, türkiyening tinchliq yolida tashlinidighan qedemler mesiliside hemishe rehberlik rolini jari qildurup kéliwatqanliqini tekitlep mundaq dédi: «hemmige melumki, rusiye pirézidénti wiladimir putin charshenbe küni istanbulgha kélidu. putin bilen jumhur reis rejep tayyip erdoghan, ottura sherqning weziyiti we rayonda sürkilishni azaytish tirishchanliqlirimiz heqqide muzakire élip baridu. bolupmu hemmimizning ortaq endishisi, iraqning bashqa döletler üchün toqunush sahesige aylinip qélishi. bu iraq hem rayonimiz üchün jiddiy xewptur. bu dairide iraq bilenmu dawamliq alaqe qilip turuwatimiz. jümlidin, bu zorawanliq heriketlirining azaytilishi yolida mesuliyitimizni ada qilip kéliwatimiz, buningdin kéyinmu shundaq qilimiz.»