chawushoghlu: amérikada émbargo qarari chiqsa, herbiy bazilar küntertipke kélidu

türkiye awazi radiyosi xewiri: türkiye tashqi ishlar ministiri mewlüt chawushoghlu amérika kongresidin türkiyege qarshi émbargo yürgüzüsh qarari chiqsa, amérikamu paydiliniwatqan adanadiki injirlik hawa armiye bazisi bilen malatyadiki kürejik radar bazisining küntertipke kélish mumkinlikini bildürdi.

tashqi ishlar ministiri mewlüt chawushoghlu bir téléwiziye qanilining ziyaritini qobul qilghanda, rusiyedin sétiwélinghan «S-400» hawa qalqan sistémisi bilen «F-35» ayropilanliri otturisida, meyli qanuniy jehettin bolsun yaki siyaset jehettin bolsun héchqandaq baghlinishning yoqluqini eskertti. u mundaq dédi:

«amérika barliq tekliplirimizge <yaq> dewatidu. zorlap téngish bilen bir yerge barghili bolmaydighanliqini chüshinishi lazim. amérika mesilige ijabiy qarisa, bizmu ijabiy qaraymiz. S-400 hujum sistémisi emes, belki qoghdinish sistémisi. F-35 ni alalmisaq bashqa tallash yolliri üstide izdinimiz.»

u amérikaning süriyediki bezi jaylarni ishghal qiliwalghan bölgünchi térrorluq teshkilati y p g|p k k bilen bolghan munasiwetlirining dawamlshiwatqanliqini tekitlep: «amérikaning y p g|p k k gha qilghan yardemliri jinayet hésablinidu. xelqara térrorizmni iqtisad bilen teminlesh dairisige kiridu» dédi.

u bezi nato döletlirining y p g ni térrorluq tehditi dep tonush mesilisidiki yiraq turush pozitsiyesi üstide toxtilip: «türkiyening xewpsizliki bilen baltiq xewpsizliki teng barawerdur. hem baltiq hemde bizning pilanimiz élan qilishni saqlawatidu. bizning élan qilinmay turup, yene biri élan qilinmaydu. bu yerde yol qoyghanliq yoq, kichikkine iltipat qilish bar. birla waqitta ikki pilan élan qilinidu. natoning türkiyeni qoghdash wezipisi bar» dédi.

tashqi ishlar ministiri mewlüt chawushoghlu türkiye bilen liwiye otturisida tüzülgen aqdéngizda déngiz hoquqi dairisini belgilesh kélishimi üstidimu toxtaldi.

u: «kélishimimiz qanungha uyghun. liwiye bilen qédérip tekshürüsh we burghilash ishlirini birlikte qilishimiz mumkin. girétsiye yaki yawropa ittipaqining xelqara qanun we adalet diwanigha munasiwetlik mezkur mesilide, sot mehkimisige oxshash qarar chiqirishi toghra emes» dédi.

u liwiyege esker ewetish mesilisi üstide toxtalghanda: «liwiyede b d t étirap qilghan hökümet bar. shunga, b d t étirap qilghan we xelqaraliq yighinlargha teklip qilinghan fayiz esseraj hökümiti qanunluq hökümet hésablinidu. türkiye qanunluq hökümet bilen bolghan alaqisini dawamlashturuwatidu. eger liwiyedin mushundaq telep kelse, uninggha qarap chiqimiz» dédi.

u jenubiy qibris rum hakimiyitining sherqiy aqdéngizdiki hidro karbon tekshürüsh paaliyetliri mesiliside, shimaliy qibris türk jumhuriyiti bilen kélishim tüzüshi, girétsiyeningmu türkiye bilen hemkarliq ornitishi kéreklikini éytti.