erdoghan bilen putinning körüshüshi bashlandi

türkiye awazi radiyosi xewiri: türkiye jumhur reisi rejep tayyip erdoghan bilen rusiye pirézidénti wladimir putin zhukowski xelqara ayrodurumida ötküzülgen uchrishishtin burun qisqa söz qildi. rejep tayyip erdoghan «MAKS-2019» xelqara awiyatsiye we alem yermenkisining échilishigha teklip qilinghanliqi munasiwiti bilen, pirézidént putingha teshekkür éytti.

u rusiyening mudapie sanaitige munasiwetlik ishlepchiqirishlirini körüsh imkaniyitige érishkenlikini eskertip: «yoluchilar ayropilanidin urush ayropilanighiche we tik ucharlardin pütkül ishlepchiqirish zenjiridin motorlarghiche bolghan hemme jeryanni körüsh pursitige érishtim. bu nuqtida, memnunluqimni bildürüshni xalaymen. urush ayropilanlirining maharetlirinimu körüshke muweppeq bolduq, Su-34, Su-35 weSu-57  ayropilanlirining maharitini birlikte körduq» dédi.

u, bular bilen birlikte alem ishlirigha munasiwetlik tetqiqatlarning tolimu ehmiyetlik ikenlikini bildürüp: «alem toghrisida hasil qilinghan ilgirileshler, ilmiy nuqtida rusiyening qaysi sewiyege kelgenliki nuqtisidin muhim ehmiyetke ige. tetqiqatchilar bilen körüshtuq, ularning alem sepirige muweppeqiyet tiliduq» dédi.

u pirézidént putin bilen ayrim we heyetler ara ötküzülidighan körüshüshlerde rayonluq mesililernimu muhakime qilish pursitige érishidighanliqlirini qeyt qildi.

rusiye pirézidénti wladimir putinmu türkiye jumhur reisi rejep tayyip erdoghan bilen sezgürlükke ige rayonluq mesililerni muhakime qilidighanliqlirini bildürdi.

ikki rehber skzini axirlashturghandin kéyin, ayrim körüshüshni bashlidi we bu körüshüsh 1 saet 20 minut dawam qildi. ayrim körüshüshtin kéyin, heyetler ara körüshüsh bashlandi. bu körüshüshtin kéyin ortaq axbarat élan qilish yighinining ötküzülüshi kütülmekte.