türkiye islandiyege naraziliq bildürdi
türkiye tashqi ishlar ministiri mewlüt chawushoghlu türkiye milliy komandisining islandiye ayrodurumida saqlitilishigha naraziliq bildürdi.
türkiye awazi radiyosi xewiri: 2020 – yilliq yawropa longqisini talishish putbol musabiqiliri dairisidiki 3 qétimliq shallash musabiqiside 3 nomurgha érishken türkiye milliy putbol komandisi (H) guruppisidiki tötinchi qétimliq musabiqe üchün islandiyege ketti.
mexsus ayropilan bilen islandiyege ketken komanda islandiyede hörmetsizlerche qarshi élindi.
putbolchilarning somkilirini tekrar – tekrar tekshürgen istiratégiye dölet xewpsizlik xadimliri türkiye komandisini ikki saetke yéqin saqlatqandin kéyin pasport kontirolluqidin ötküzdi.
türkiye tashqi ishlar ministiri mewlüt chawushoghlu ammiwi ortaqlishish tor béti Twitter sehipiside bu heqte élan qilghan bayanatida, islandiyege naraziliq bildürüp mundaq dédi: «milliy komandimizning islandiye ayrodurumida duch kelgen muamilini diplomatik qaide – qanuniyetler jehettinmu, insanperwerlik jehettinmu qobul qilghili bolmaydu.»
jumhur reislik sariyi uchur - alaqe ishliri bashqarmisining bashliqi fahrettin altun, bu heqte élan qilghan bayanatida, türkiye milliy putbol komandisining islandiyede duch kelgen pozitsiyening diplomatik qaide – yosun we tenterbiye mahirlirigha xas pozitsiye emeslikini tekitlep mundaq dédi: «bu weqede jawabkarliqi bar islandiye dairilirini qattiq eyibleymen, özgirishlerni dawamliq közitiwatimiz.»
jumhur reislik sariyi bayanatchisi ibrahim qalin, ammiwi ortaqlishish tor béti Twitter sehipiside, islandiyege naraziliq bildürüp mundaq dédi: «milliy komandimizgha islandiyede rawa körülgen hörmetsizlikni qobul qilish mumkin emes. bu heqte tégishlik qedem tashlinidu. derweqe, dölitimiz bu heqte heriketke ötti. dölitimiz we xelqimiz herdaim milliy komandimizni qollaydu. milliy komandimiz islandiyege eng güzel jawabni putbol saheside béridu.»
adalet we tereqqiyat partiyesi bayanatchisi ömer chelikmu ammiwi ortaqlishish tor béti Twitter sehipiside bu heqte élan qilghan bayanatida, mundaq dédi: «insanperwerlikning chek – chégraliridin halqip ketken, tenterbiyening rohigha mas kelmeydighan we diplomatik jehettin qobul qilishqa bolmaydighan bu muamilining jawabkari islandiye dairiliridur. milliy komandimiz duch kelgen bu muamile bir xil zorawanliq hésablinidu. bundaq qalaq muamilisi tüpeyli islandiye dairiliri türkiyedin kechürüm sorishi lazim, bu xataliqini tüzitidighan qedemlerni tashlishi kérek. milliy komandimizgha saylam yollaymiz. pütkül xelqimizning qizghin qollaydighanliqi milliy komandimizghimu besh qoldek ayan. derweqe, milliy komandimizning qalaq muamililerge, tenterbiyening rohigha uyghun muweppeqiyetlerni qolgha keltürüsh arqiliq eng yaxshi shekilde jawab qayturighanliqigha ishenchimiz kamil, bizning yürikimiz hemishe mahirlirimizning yürekliri bilen birlikte soqidu.»
