erdoghanning sözlirining esli mahiyiti özgertiliwétildi
jumhur reislik alaqe - munasiwet ishliri bashliqi fexrittin altun jumhur reis rejep tayyip erdoghanning anzaklar heqqidiki sözlirining esli mahiyitining özgertiliwétilgenlikini éytti.
türkiye awazi radiyosi xewiri: jumhur reislik alaqe - munasiwet ishliri bashliqi fexrittin altun ijtimaiy taratqu hésabi tiwittérdin élan qilghan bayanatida, jumhur reis rejep tayyip erdoghanning sözlirining nishani yéngi zélandiyening kiristchorch shehiride 50 musulmanni öltürgen térrorchi teripidin élan qilinghan xitabname ikenlikini tekitlidi.
fexrittin altun erdoghanning 18 - mart shihétlerni xatirilesh küni we chanaqqele déngiz zepirining 104 – xatire yili dairiside qilghan sözi üstide toxtilip mundaq dédi:
«epsuski jumhur reis rejep tayyip erdoghanning sözlirining esli mahiyiti özgertiwétildi. jumhur reisning sözliri yéngi zélandiyening kiristchorch shehiride 50 bigunah musulmanni öltürgen térrorchining atalmish xitabnamisigha qaritilghan idi. türkler anzak méhmanlirigha nisbeten daim yéqin we méhmandostluq bilen muamile qilip kelgen. térrorchining xitabnamisi peqet erdoghannila emes, öz nöwitide yene türkiye döliti we xelqinimu hujum nishani qilghan idi. jumhur reis chanaqqele zepirining xatire yili munasiwiti bilen qilghan sözide, türkiyege qarshi ötmüshte we hazirmu dawamlshiwatqan hujumlargha dair tarixiy nuqtidin öz qarashlirini otturigha qoyghan idi.»
