aqar, türkiyening amérikidin F-35 urush ayropilanlirini tapshurup élish waqtini ortaqlashti
dölet mudapie ministiri xulusi aqar, amérika qoshma ishtatlirining F-35 urush ayropilanlirini mushu yilning noyabir éyida türkiyege tapshurup bérishining kütülüwatqanliqini éytti.
türkiye awazi radiyosi xewiri: xulusi aqar, tünügün türkiye armiyesi bash ishtab bashliqi général - polkownik yashar güler, herbiy qomandanlar bilen birlikte türkiye dem élishqa chiqqan ofitsérlar jemiyiti rehberlik heyiti shundaqla bir qisim ofitsérlar bilen enqerediki sihhiye armiye öyide chüshlük ziyapette körüshti.
aqar ziyapet jeryanidiki sözi esnasida, türkiyening rusiyedin sétiwalidighan S-400 hawa mudapie sistémilirini bahane qiliwatqan amérikiliq bezi emeldarlarning, F-35 urush ayropilanlirining tapshurup bérilishige alaqidar bayanatliri üstide toxtaldi.
türkiye mohtaj bolghan peytlerde natogha eza bezi döletlerdin hawa mudapie sistémisini ekélish jehette mesililerning körülgenlikini, bu éhtiyajning rusiyedin S-400 hawa mudapie sistémilirini sétiwélish arqiliq qamdilidighanliqini xatirilitip ötken aqar, amérikiliq emeldarlar bir qatar bayanatlarni bergen bolsimu, F-35 urush ayropilanlirini tapshurup élish musapisining hazir normal dawamlishiwatqanliqini eskertti.
türkiyening F-35 urush ayropilanliri mesiliside yelkisidiki barliq mejburiyetlirini del jayida ada qilghanliqini we ada qilishni dawamlashturidighanliqini tekitligen aqar, «uchquchilirimiz, rémontchi xadimlirimiz amérikida telim élishni dawamlashturmaqta. noyabir éyida ayropilanlarning malatyagha kélishini kütmektimiz. malatyadiki üstqurulma teyyarliqlirimiz tamamlandi» dédi.
