türkiye firatning sherqidiki tehditlerni bitchit qildu
adalet we tereqqiyat partiyesi (AK Parti) ning bayanatchisi ömer chelik türkiyening firat deryasining sherqidiki tehditni bitchit qilidighanliqini éytti.
türkiye awazi radiyosi xewiri: adalet we tereqqiyat partiyesining bayanatchisi ömer chelik partiye merkizi ijraiye kéngishining yighini dawam qiliwatqan peytte, partiye merkizide axbarat élan qilish yighini ötküzüp, muxbirlarning küntertiptiki mesililer toghrisidiki soallirigha jawab berdi.
ömer chelik amérikaning süriyedin eskerlirini chékindürüsh qararidin kéyin, yéqinqi künlerde süriyening shimalida yüz bergen térrorluq hujumliri üstide toxtaldi we: «qachan toghra qedemler bésilsa, mushundaq ighwagerchilikler otturigha chiqidu» dédi.
u chékinish qararidin kéyin, amérika tereptin élan qilinghan bayanatlar üstide alahide toxtilip: «bu ighwagerchiliklerning kimler teripidin qiliniwatqanliqini bilish üchün, bu özgirishlerning kimlerge ziyanliq ikenlikini arqimu arqa qoyghinimizda otturigha chiqidu. biz bu ighwagerchiliklerge qarimay mesilini hel qilish pilanining dawam qilishini küchlük ümid qilimiz» dédi.
u amérikaning süriyedin eskerlirini chékindürüshke aldirishi kéreklikini alahide tekitlidi. u türkiyening térrorluq teshkilati daéshqa qarshi qiilwatqan küreshke rehberlik qilalaydighan we munbichta bixeterlikni üstige alalaydighan, shundaqla bixeter rayonni tesis qilalaydighan küchke hemde iqtidargha ige ikenlikini tekitlidi.
u süriyede tesis qilinishi pilan qilinghan «bixeter rayon» heqqide chüshenche bérip, mundaq dédi:
«deslepki qedemde, y p g bixeter rayondin chiqirilidu. bu rayonda daésh yaki y p g ning bolushini xalimaymiz, biraq bu yerdiki eslidiki mesile, süriyening her qandaq jayida térrorluq teshkilatining bolmasliqidur.»
u türkiyening bu heqtiki meydanini yaxshi chüshinish kéreklikini eskertip: «firatning sherqide, süriyening shimalida otturigha chiqqan menzire, türkiye üchün birinchi derijide tehdit hésablinidu. türkiye jumhuriyiti bu tehditni bitchit qilidu. bu tehditni bitchit qilish üchün ittipaqdashlirimiz bilen ochuq-ashkara halda emelge ashurushni xalaymiz. ittipaqdashlirimiz bilen her türlük hemkarliqlarni ornitiwatimiz. biraq, néme bolushidin qetiynezer, ittipaqdashlirimiz bu mesilige ehmiyet bersun yaki bermisun, türkiye jumhuriyiti özining bixeterlikige munasiwetlik tedbirlerni yolgha qoyidu» dédi.
