bash ishtab bashliqi güler amérika bash ishtab bashliqi dunford bilen körüshti

türkiye awazi radiyosi xewiri: bash ishtab bashqarmisining bildürüshiche, «zorawanliq terepdari ashqun teshkilatlargha qarshi  küresh bash ishtab bashliqliri yighini» gha qatnishish üchün amérika qoshma ishtatlirida ziyarette boluwatqan général yashar güler, amérika qoshma ishtatliri bash ishtab bashliqi général juzéf dunford bilen körüshken. uchrishishta, rayonluq bixeterlik we térrorizmgha qarshi  küresh qatarliq mesililer muzakire qilinghan.

amérika qoshma ishtatliri bash ishtab bashqarmisi bayanatchisi polkownik partik ridér bu heqte élan qilghan bayanatida, uchrishishta, güler bilen dunfordning, türkiye – amérika munasiwetlirining ehmiyiti üstide toxtalghanliqini tekitlep mundaq dédi: «ikki qomandan süriyening munbich rayonida tinchliq we muqimliq ornitish meqsitide dawamlishiwatqan muzakirilerni dawamlashturdi. shuning bilen bir waqitta, ikki bash ishtab bashliqi, térrorluq teshkilati daéshni üzül - késil yoqitish üchün térrorizmgha qarshi  küresh mesiliside türkiye – amérika hemkarliqining ehmiyiti üstide söhbet élip bardi.»

u yene, shimaliy atlantik ehdi teshkilatining ikki halqiliq döliti bolghan amérika qoshma ishtatliri bilen türkiyening küchlük herbiy munasiwetlirining üzlüksiz dawamlishiwatqanliqinimu sözlirige ilawe qildi.