munbich pilanida keynige tartish taktikisidin waz kéchish kérek

türkiye awazi radiyosi xewiri: jumhur reislik sariyi bayanatchisi ibrahim kalin jumhur reis rejep tayyip erdoghan bashchiliqida chaqirilghan kabént yighinidin kéyin, muxbirlarning soallirigha jawab berdi.

u: «munbichning nöwettiki weziyiti qandaq?» dégen soalgha jawab bérip, amérika bilen ishlarning 90 künlük heriket pilani boyiche élip bérilishida pikir birliki hasil qilinghanliqini bildürdi.

ibrahim kalin bu mesilide «gollash taktikiliri» ning qollinilghanliqini epsuslinarliq ichide körgenliklirini eskertip: «biz her derijilik uchrishishlarda amérikaliq mensepdashlirimizgha bu gollash taktikiliridin waz kéchishni we munbich mesilisini heriket pilani boyiche emelge ashurushni dep kelduq. eslide telim-terbiye ishliri, andin charlash qisimlirigha telim-terbiye bérish, undin kéyin, birlikte ortaq charlash basquchliri alliburun axirlishishi kérek idi» dédi.

u yene mundaq dédi:

«déginimdek, undaq yaki mundaq sewebler tüpeyli békitilgen waqit daim kéchiktürüldi. biz emdi buning toxtitilishini telep qilimiz. mundaqche éytqanda, u yerde térrorluq teshkilatigha qarshi ortaq bixeterlik tedbirlirini yolgha qoyidighan bolsaq, birlikte ortaq charlishimiz we rayonni bixeterlik astigha élip, munbichliqlarning öz yurtlirigha baldurraq qaytishini kapalet astigha élishimiz kérek. bular ortaq meqsitimiz hésablinidu. undaq bolsa, buni baldurraq emelge ashurayli, biz üchün éytqanda, buningdin téximu kéchiktürüshning chüshendürgili bolidighan bir teripi yoq. shunga, bu bizning ümidimiz. munasiwetlik organlirimiz, dölet mudapie ministirliqimiz, bolupmu mezkur mesilige munasiwetlik barliq terepler her küni körüshüwatidu, biraq keynige tartish taktikisi barghanséri chongiyip mesilige aylinishqa bashlidi. bu yerdin qayta-qayta shuni démekchimenki, her sewiyede munbich heriket pilani baldurraq emelge ashurulushi kérek.»