türkiye-qazaqistan otturisida 20 din artuq kélishim imzalandi

türkiye awazi radiyosi xewiri: erdoghan bilen nezerbayéw ayrim söhbet ötküzüp, yuqiri sewiyelik istratégiyelik kéngesh yighinigha ishtirak qilghandin kéyin, birlikte axbarat élan qilish yighini uyushturdi.

rejep tayyip erdoghan 3-séntebir nezerbayéw bilen qirghizistanda ötküzülgen türk kéngishining 6-nöwetlik yighini munasiwiti bilen körüshkenlikini xatirilitip, bügün (13-séntebir) ki körüshüsh we heyetler ara ötküzülgen uchrishishlarda, ikki döletning küntertipidiki barliq mesililerni semimiy halda muzakire qilghanliqlirini qeyt qildi.

u muzakirelerning keng dairilik we ünümlük bolghanliqini eskertip, nezerbayéwning ziyariti wesilisi bilen, ikki dölet otturisida besh höjjetning imzalanghanliqini bildürdi.

u tünügün (12-séntebir) enqerede toplanghan türkiye-qazaqistan sélinma munbiride jemiy 2 milyard dollargha yétidighan 20 din artuq kélishimning, ikki döletning munasiwetlik organliri we mexsus sanaet shirketliri teripidin imzalanghanliqini qeyt qildi.

u: «fethullahchi térrorluq teshkilatigha qarshi küresh mesilisidimu öz ara pikir almashturduq. bu térrorluq teshkilatining dölitimiz, xelqimiz we mewjut bolup turuwatqan barliq döletler üchün peyda qilghan tehditlirini barliq terepliri bilen muzakire qilduq. bügün yene, iqtisad, soda, mudapie, medeniyet we maarip qatarliq ikki terepning küntertipidin orun alghan bashqa mesililernimu muzakire qilduq» dédi.

ortaq axbarat élan qilish yighinidin burun, ikki rehberning huzurida tüzülgen kélishimlerge imza qoyush murasimi ötküzülgen.

igilinishiche, türkiye dölet mudapie ministiri hulusi akar bilen qazaqistan dölet mudapie ministiri nurlan ermekbayéw ikki dölet otturisida tüzülgen «herbiy hemkarliq kélishimi» we «herbiy sahede mexpiy uchurlarni öz ara qoghdash kélishimi» ge imza qoyghan.

türkiye tashqi ishlar ministiri mewlüt chawushoghlu bilen qazaqistan sélinma we tereqqiyat ministiri jénis qassimbék «yéngi ortaq iqtisad pirogrammisining 2020-2018 heriket pilani» gha imza qoyghan.

türkiye medeniyet we sayahet ishliri ministiri mehmet nuri ersoy bilen qazaqistan medeniyet we tenterbiye ministiri aristanbék mukmahemidiyuli «medeniyet merkezlirining qurulushi we paaliyetlirige munasiwetlik kélishim» ni imzalighan.

türkiye yéza igiliki we orman ministirliqi bilen qazaqistan yéza igiliki ministirliqi otturisida tüzülgen «yéza igilikide hemkarliq ornitish kélishimi» ge, muawin yéza igilik we orman ministiri mehmet hadi tunch bilen qazaqistanning muawin yéza igilik ministiri yerlan nisanbayéw imza qoyghan.