türkiye amérikaning éléktironluq mehsulatlirini bayqut qilidu

türkiye awazi radiyosi xewiri: jumhur reis rejep tayyip erdoghan siyaset, iqtisad we jemiyet tetqiqatliri wexpi (SETA) teripidin enqere soda-sanaetchiler birleshmisining kongre zalida ötküzülgen «adalet we tereqqiyat partiyesi hakimiyet tutqanliqining 16-yili söhbet yighini» da söz qildi.

rejep tayyip erdoghan sözide, amérikaning émbargo qarari üstide toxtaldi. u: «türkiyege qarshi ochuq-ashkara iqtisadiy hujum qiliniwatidu, bizge diweyliginiche kéliwatidu» dédi we munasiwetlik barliq tedbirlerni alghanliqlirini, buni izchil dawamlashturidighanliqlirini qeyt qildi.

u türkiye iqtisadining barghanséri tereqqiy qiliwatqanliqini bildürüp: «ishqa orunlashturushta we sayahetchilikte rékort buzghan halda tereqqiy qilghan bir mezgildin ötüwatimiz. sayahetchilikte zor tereqqiyatlarni bashtin kechürüwatimiz. xewpsizlikning we muqimliqning kapaliti bolghan dölet ornigha igimiz. bügün dölitimiz her nuqtidin dunyadiki eng mustehkem bolghan bankichiliq sistémiliridin birige ige» dédi.

u amérikaning nurghunlighan döletlerge iqtisadiy urush élan qilghanliqini eskertti we: «dölitimizge qarshi yene chong heriketler bar» dédi.

u türkiyening tereqqiy qilishigha chidiyalmighanlarning iqtisadni qoral qilip paydilinishtin yanmighanliqini, hökümetning 2016-yili 15-iyul yüz bergen herbiy-siyasiy özgirish qozghashqa urunush herikitini xelq bilen birlikte meghlub qilghinigha oxshash, dollar we pul paxalliqigha qarshimu qeddini tik tutidighanliqini tekitlidi.

u xelqqe qolidiki chet el pullirini türkiye lirasigha almashturushni chaqiriq qilip: «türkiye lirasining sheripini qoghdighanliqimiz ulargha bérilgen eng yaxshi jawab bolidu» dédi.

«amérikaning éléktironluq mehsulatlirini bayqut qilimiz» dégen rejep tayyip erdoghan, sözini mundaq dawamlashturdi:

«bu hepte ichide xelqaraliq jemiyetler bilen nurghun uchrishishlirimiz bolidu. zich alaqe ornitiwatimiz, gherbtiki dostlirimizgha rehmet éytiwatimiz, ular qiyin künlerde yénimizda boluwatidu, ular bilen körüshüwatimiz. ular bilen türkiyede bir yerge jem bolush üchün tirishchanliq körsitiwatimiz, hemkarliqimizni mushundaq dawamlashturimiz.»