erdoghan qibris türklirining heq-hoquqini qoghdaydighanliqlirini bildürdi

türkiye awazi radiyosi xewiri: jumhur reis rejep tayyip erdoghan ezerbeyjan ziyaritini axirlashturup, shimaliy qibris türk jumhuriyitige yétip bardi. u shimaliy qibris türk jumhuriyiti jumhur reisi mustafa akinji bilen ayrim körüshüp, xizmet ziyapitide birge boldi we ortaq axbarat élan qilish yighini ötküzdi.

u: "türkiye qibris türk xelqining mesilining hel bolmasliqining ziyinigha uchrishigha hergizmu közini yumup turmaydu, qibris türklirining qibris rum hakimiyitide az sanliqlargha aylandurulushigha qetiy ruxset qilmaydu" dédi.

rejep tayyip erdoghan shimaliy qibris türk jumhuriyitining su éhtiyajini hel qilghanliqlirini, bu arqiliq hem shimaliy qibris türk jumhuriyitini istratégiyelik nuqtidin üstün qilish hemde iqtisadigha zor hesse qoshush üchün muhim qedemlerni tashlighanliqlirini bildürdi.

u: "aldimzdiki mezgillerde shimaliy qibris türk jumhuriyitini sherqiy aqdéngizda jelp qilarliq merkezge aylandurup, kishi béshigha chüshken milliy kirimni ikki hesse ashurush birinchi meqsitimiz bolidu" dédi.

jumhur reis rejep tayyip erdoghan akinji bilen ayrim körüshkende, küntertiptiki nurghun mesililerni muzakire qilghanliqlirini, bash ministir tufan erhürman we hökümiti bilen xizmet ziyapitide körüshüsh pursitige érishkenliklirini bildürdi.

u: "qibris milliy dewayimiz, qibrista adil we uzun muddetlik hel qilish charisi tépish ghaymizdur. biz türk terep bolush süpitimiz bilen, bu mesilide yéqinqi 50 yildin buyan her xil tirishchanliqlarni körsitip kelduq. biraq, aralda keng dairelik hel qilishni nishan qilghan musapilerning netijisi buningdin del bir yil burun qibris konfransining netijisiz bolushi bilen axirlashti. buning sewebi qibris rum hakimiyiti teripining dawamliq özini aralning birdinbir xojayini süpitide körüshi, qibris türkliri bilen siyasiy barawerlik asasida ortaqliq hasil qilishqa we siyasiy küchni ortaqlishishqa yéqin kelmeslikidur. aridin ötken bir yilda rumlarning bu qarishida héchqandaq özgirish bolmidi" dédi.