«türkiye bilen xitay bir-birini chüshengenséri ariliqi téximu yéqinlishidu»
xitayda ziyarette boliwatqan ministir numan kurtulmush türkiye-xitay munasiwetlirining küchiyishini arzu qilidighanliqini bildürdi.
türkiye awazi radiyosi xewiri: türkiye xitay bilen nurghun sahede ortaq layihe wujudqa chiqirish sharaitige ige.
shangxey tiyatirxanisida« 2018 sayahet yili » munasiwiti bilen ötküzülgen senet paaliyitige medeniyet we sayahet ishliri ministiri numan kurtulmush, türkiyening béyjingda turushluq elchisi abdulqadir emin önen, elchixana xadimliri bolup nurghun kishi qatnashti.
ministir kurtulmush 2018-yilining ikki döletning sayahet munasiwiti nuqtisidin muqeddime hésablinidighanliqini eskertip, bu munasiwetning kélechekte téximu yaxshi bolushini arzu qilidighanliqini éytti.
«türkiye bilen xitay jughrapiyelik jehettin bir-biridin tolimu yiraqta bolsimu, lékin kelgüside nurghun sahede ortaq layihe wujudqa chiqirish sharaitige ige»dégen numan kurtulmush, asiyaning gherbide bolghan türkiye bilen sherqide bolghan xitayning tarixiy yipek yoli nuqtisidinmu ikki muhim dölet ikenlikini eskertti.
kurtulmush yipek yolini qaytidin janlandurushni meqset qilghan «bir belwagh we bir yol»sitiratégiyesi dairiside ikki dölet arisidiki hemkarliqning küchiyidighanliqini éytti.
kurtulmush jughrapiyelik jehettin ikki dölet bir-birige yiraqta bolsimu xitay bilen türkiyening nurghun sahede ortaq menpeetni barliqini tekitlep munularni dédi: «ikki dölet bir-birini chüshengenséri ariliqimizdiki bu uzaqliqning yéqinlishidighanliqigha ishinimen.»
«2018 türkiye sayahet yili»munasiwiti bilen xitayning nurghun shehiride 60din artuq paaliyetning uyushturulidighanliqini éytqan kurtulmush, bu paaliyetlerning ikki milletning biri-birige yéqinlishishigha türtke bolidighanliqini éytti.
kurtulmush medeniyetler böshüki bolghan türkiyening tiruwadin osmanlighiche bolup jemiy 25 chong medeniyetke sahibxanliq qilghanliqini eslitip ötüp, dunyagha meshhur bolghan anadolu senet ömikining «tiroya»namliq senet paaliyitini chüshendürüp ötti.
ministir kurtulmushning sözidin kéyin anadolu senet ömiki artisliri orundighan «tiroya»namliq usul tamashibinlarning qiziqishini qozghidi.
