erdoghan qirghizistan pirézidénti jéénbékow bilen qoshma muxbirlarni kütüwélish yighini ötküzdi
jumhur reis rejep tayyip erdoghan, «türkiye eng axirqi fethullahchi xain qanungha hésab bérip bolghuche dölet ichi – sirtidiki bu teshkilatqa qarshi kürishini dawamlashturidu» dédi.
türkiye awazi radiyos xewiri: jumhur reis erdoghan, türkiyede dölet ishliri ziyaritide bolghan qirghizistan pirézidénti sooronbay jéénbékow bilen körüshkendin kéyin qoshma muxbirlarni kütüwélish yighini ötküzdi. jéénbékowni türkiyede kütüwalghanliqidin bextiyarliq hés qilghanliqini tilgha erdoghan, uni pirézidéntliq saylimida ghelibe qilghanliqi munasiwiti bilen tebriklidi.
qirghizistan pirézidéntining saylamdin kéyinki tunji chet el ziyaritini türkiyege qaratqanliqini eskertken erdoghan, bu chongqur menige ige ziyaret üchün minnetdarliq bildürdi.
ikki dölet otturisidiki yéqin hemkarliqning (fethullahchi térrorluq teshkilatining) 2016 – yili 15 – iyuldiki herbiy – siyasiy özgirish qozghashqa urunush herikitidin kéyin her xil sinaqlarni bashtin kechürgenlikini bildürgen erdoghan sözini dawamlashturup mundaq dédi: «fethullahchi térrorluq teshkilati nopuzi astidiki bezi kishilerdin paydilinip bu hemkarliqimizni zeherleshke, (uligha) partlatquch qoyushqa we siziqidin chiqirip tashlashqa tirishti. fethullahchilar we ularning tesiri astidiki kishiler, türkiye bilen qirghizistan arisigha pitne uruqlirini chéchish üchün her türlük peskeshlikni, rezillikni namayan qildi. pirézidént jéénbékowning ziyaritini fethullahchi térrorluq teshkilatining bu urunushlirigha bérilgen eng yaxshi jawab, dep qaraymen. türkiye, eng axirqi fethullahchi xain qanungha hésab bérip bolghuche dölet ichi – sirtidiki bu teshkilatqa qarshi kürishini dawamlashturidu. 251 adimimizning qénini tökken, peqet bu sarayning etrapida 29 qérindishimizni shéhit qilghan bu peskeshlerning qollirini, bileklirini pulanglitip aylinip yürüshige qetiy yol qoymaymiz.»
bu mesilining türkiye – qirghizistan munasiwetlirining kélechiki nuqtisidin muhimliqini qeyt qilghan erdoghan, «hörmetlik jéénbékowning fethullahchi térrorluq teshkilati mesiliside téximu estayidil heriket qilidighanliqigha we kéreklik tedbirlerni téz sürette yolgha qoyidighanliqigha ishinimen. bizmu fethullahchi térrorluq teshkilatigha qarshi küresh jehette alaqidar xadimlirimiz bilen birlikte uning yénida turimiz» dédi.
qirghizistan pirézidénti sooronbay jéénbékow, jumhur reis erdoghan bilen ijabiy shundaqla ünümlük söhbet ötküzgenlikini eskertip, «qérindash türkiye jumhuriyiti bilen bolghan qérindashliq we shérikchilik munasiwetlirining güllendürülüshining biz yürgüzüwatqan siyasetning aldinqi pilandiki nishani ikenlikini alahide tekitlep ötimen» dédi.
muxbirlarni kütüwélish yighinidin ilgiri jumhur reis rejep tayyip erdoghan bilen qirghizistan pirézidénti sooronbay jéénbékowning huzurida, türkiye jumhuriyiti bilen qirghizistan hökümiti arisida alte türlük kélishim imzalandi.
