beytullahimning bashliqi erdoghangha rehmet éytti
pelestinning ishghaliyet astidiki iyordan deryasining gherbiy qirghiqigha jaylashqan beytullahim bazirining bashliqi anton selman quddus türkiyening, jümlidin jumhur reis rejep tayyip erdoghanning körsetken tirishchanliqliridin minnetdar ikenliklirini éytti.
türkiye awazi radiyosi xewiri: iyordan deryasining gherbiy qirghiqidiki beytullahim bazarliq hökümetning bashliqi anton selman italiye tashqi ishlar ministirliqida ötküzülgen «muqeddes zéminlardiki medeniyet we dinlar ara diyalog» qa munasiwetlik ilmiy muhakime yighinida söz qildi we b d t omumiy kéngishidiki quddus qarari üstide toxtaldi.
u türkiyening tirishchanliqi bilen teyyarlanghan we amérika pirézidénti donald trampning quddus qararini tenqid qilghan qarar layihesining b d t omumiy kéngishide qobul qilinghanliqining, quddusning ishghaliyet astidiki pelestin zéminliri arisidin orun alghanliqining ispati ikenlikini bildürdi.
u b d t omumiy kéngishide qobul qilinghan qararning pelestin üchün intayin muhim ehmiyetke ige ikenlikini eskertip: «yéqinqi ikki hepte ichide yüz bergen weqeler we tünügün (21-dékabir) omumiy kéngeshtiki awazgha qoyush, bizge shuni körsitip bériduki, xelqaraliq jemiyet amérikadin ibaret emes. xelqaraliq jemiyet ottura sherqte tinchliqning hökümran bolushini xalaydighan toghra niyetlik we durus döletlerdin teshkil tapidu. mezkur qarar amérika we isirailiyening ishghaliyet astidiki zéminlargha munasiwetlik her qandaq söz, tebir yaki menani özgertelmaydighanliqini körsitip béridu» dédi.
u türkiyening pelestinge qilghan yardemliri üstide toxtilip, mundaq dédi:
«türkiye bu mesilide özining küchlük meydanini namayan qildi. türkiye pelestinni qollighan döletler arisida hemmining aldida turidu, shunga türkiyedin minnetdarmiz. türkiyening körsetken tirishchanliqlirining muqeddes zéminlargha we pelestinge tinchliq élip kélishini, shundaqla pelestinliklerning yüz-abruyini qaytidin kötürüp, kishilik heq-hoquqlirini we erkinlikini qoligha élishigha wesile bolushini ümid qilimiz. türkiyening, jümlidin jumhur reis rejep tayyip erdoghanning körsetken barliq tirishchanliqliridin minnetdarmiz. eng qiyin künlerde qalghanda rejep tayyip erdoghanning biz pelestinliklerni küchining bériche qollighanliqidin we buni tilgha alghanliqidin özimizni shereplik hés qilimiz.»
