«bir belbagh we bir yol layihesining roli tolimu zordur»
iqtisad ishliri minsitiri nihat zeybekchi bir belbagh we bir yol layihesining rolining tolimu zorliqini bildürdi.
türkiye awazi radiyosi xewiri: iqtisad ishliri minsitiri nihat zeybekchi bir belbagh we bir yol layihesi hemkarliq munasiwet tori dairiside türkiyening gholluq sélinma baziliridin birige aylinidighanliqini, bu jehette türkiye bilen xitay we layihege chétishliq döletler otturisidiki hemkarliq munasiwetliridin chong ümid kütidighanliqlirini éytti.
zeybekchi xitay xelqara radiyosining ziyaritini qobul qilip bir belbagh we bir yol layihesi hemkarliq munasiwet tori nuqtisidin xitay- türkiye otturisidiki hemkarliq munasiwitige baha berdi.
bu yil yazda bakü-tiflis-kars tömür yol liniyesining xizmetke kirishtürülüshi bilen teng, xitaydin londonghiche bir tutash tiransport xizmitining élip bérilidighanliqini éytqan zeybekchi, qatnash yollirining téz sürette zamaniwilashturulushi kéreklikini alahide eskertip ötti.
asiyaning yawropa we afriqigha échilishi, shundaqla xelqara sodining tereqqiiyati qatarliq jehetlerde türkiyening muhim rol oynaydighanliqini éytqan nihat zeybekchi, türkiyening chong sélinma bazisigha aylinidighanliqini, xitay we türkiye otturisidiki sodining qoyuq bolidighanliqini bildürdi.
iqtisad ishliri ministiri nihat zeybekchi türkiye bilen xitay otturisidiki soda munasiwetliride hasil bolghan ilgirilesh üstidimu toxtaldi.
yéqinqi 10 yil mabeynide xitay bilen türkiye otturisidiki sodining üch hesse ashqanliqini éytqan nihat zeybekchi, ikki dölet otturisida soda jehettin tengpusizliqning barliqini, bu ehwalning deslepte normal hésablinidighanliqini we kéyinki yillarda bolsa ikki dölet otturisidiki sodining téximu tengpung haletke kélidighanliqini bildürdi.
nihat zeybekchi xitay bilen türkiye otturisidiki sodining tereqqiyat ehwali üstide toxtilip munularni bayan qilip ötti: «nöwette ikki dölet otturisida 28-30 milyard dollar etirapida soda sommisi mewjut, bu soda sommisini 60 milyardqa, hetta 100 milyard dollargha yetküzmeslik üchün hichqandaq sewebimiz yoq, bu nishangha yétishning asasliq charisi mebleghdur. yéqinqi 3 yil ichide ikki dölet otturisida 3 hesse ashqan soda sommisining, aldimizdiki on yil ichide yene 3 hesse ashidighanliqigha shahit bolishimiz mumkin.»
bir belbagh we bir yol layihesi hemkarliq munasiwet torining rayonluq we dunyawi hemkarliqni kücheytish jehettiki roli toghruluq toxtalghan nihat zeybekchi, bu munasiwet torining tereqqiyatni kücheytidighanliqini, xelqaraning bir pütünlishishini tézleshtüridighanliqini we dunya tinchliqigha hesse qoshidighanliqini tekitlidi.
soda munasiwetliri bolmighan döletler otturisida ixtilaplarning köp we keskin bolidighanliqini alahide eskertip ötken minsitir zeybekchi, iqtisadiy munasiwetliri bolghan döletler otturisida bolsa siyasiy mesililerning kélip chiqish éhtimalining töwen bolidighanliqini we bu döletlerning bir-birige ijabiy pozitsiye tutushqa mayil bolidighanliqlirini sözlep ötti.
nihat zeybekchi bir belbagh we bir yol layihesi hemkarliq munasiwet torining her qaysi döletler otturisida yéqin munasiwet berpa qilishtimu muhim rol oynaydighanliqini tekitlidi.
