erdoghan: dunyani astin-üstün qiliwétimen
dölitimiz jumhur reisi rejep tayyip erdoghan «tügidi» dep bilidighan natsizmning gérmaniyede hazirmu barliqini we dawamlishiwatqanliqini éytti.
türkiye awazi radiyosi xewiri: rejep tayyip erdoghan istanbulda ötküzülgen «tokatliqlar kéchisi» de, gérmaniyening türkiye ministirlirigha yighilish ötküzüshi üchün ruxset bermigenlikini yene bir qétim tenqid qildi. u: «men xalisam u yerge barimen, dölitinglargha kirgüzmisenglar yaki gep qilghili qoymisanglar dunyani astin-üstün qiliwétimen» dédi.
u gérmaniye hökümitini tenqid qilip: «démokratiyege ishinidighan dunyagha xitab qilimen؛ eger erkinlik üchün küresh qiliwatqan bolsaq, eger pikir erkinlikidin biaram bolmisaq, eger démokratiyege ishensek, bizning aldimizni héchkim tosiyalmaydu, buni mushundaq chüshinish kérek» dédi.
u térrorluq teshkilati ezalirining saylam seperwerlik paaliyetlirige qarshi her qandaq yerdin erkin paydilanghanliqini, türkiyede mehkumluqqa höküm qilinghan térrorluq teshkilati kattibashlirigha saraylarda médal taqalghanliqini eskertip, bundaq adaletsiz muamilini qobul qilishning mumkin emeslikini tekitlidi. u mundaq dédi:
«mana bu silerning démokratiye dégininglar, erkinlik qarishinglar. türkiyede mehkumluqqa höküm qilinghan bir ademni, siler dölitinglarda erkinlikke qoyup bérilgendek muamile qilsanglar, buninggha mesul bolusiler we jinayetchilerge yardem qilish bilen eyiblinip, sotqa tartilishinglar kérek. mushundaq bolushigha qarimay, bizning ministirlirimiz öz puqraliri we yurtdashliri bilen yighilish ötküzmekchi bolghanda, weziyet del tetürsige özgerdi» dédi.
jumhur reis rejep tayyip erdoghan fethullahchi térrorluq teshkilatining 15-iyuldiki herbiy-siyasiy özgirish qozghashqa urunush herikiti toghrisida toxtaldi. u xainlar tökken qanning hésabini qanun dairiside sorighanliqlirini, fethullahchi térrorluq teshkilatigha qarshi küreshning, türkiye jumhuriyitining yéqinqi yillardaikiqilghan eng qiyin, eng keskin we hayatiy ehmiyetke ige kürishi ikenlikini qeyt qildi.
rejep tayyip erdoghan yawropa sheherlirining yillardin buyan türkiyedin qéchip ketken qoli qangha boyalghan térroristlargha qandaq quchaq achqanliqini közitip kelgenlikini bildürdi. u ölüm jazasi toghrisida toxtilip, türkiye büyük millet mejlisi (parlaménti) din qarar chiqqan ehwalda özining testiqlaydighanliqini éytti.
