kojaelide jasusluq gumandari bir xitay sotqa chiqirildi
gumandar jawchenning ilgiri kojaelide saqchini öltürüshke urunghanliqi we yene térrorluq teshkilati p k k gha eza bolush bilenmu eyiblengenliki ilgiri sürüldi.
türkiye awazi radiyosi xewiri: amérika pasporti bilen türkiyege kelgen we kojaeli köchmenlerni qayturuwétish merkizide amanliqni saqlash xadimlirini öltürüshke urunush bilen eyiblinip, sotqa chiqirilghan jawchenning ilgiri istanbulda herbiy jasusluq bilen eyiblinip tutush buyruqi chiqirilghanliqimu ilgiri sürüldi.
amérika pasporti bilen 2016 – yili 15 – noyabirda türkiyege kelgen tégi xitay, özi amérika puqrasi jawchen iismlik gumandarning nuseybindimu térrorluq teshkilati p k k gha eza bolush bilen eyiblinip sot qilighanliqi bildürüldi.
gumandarning dadisi kém chan, adwukati yalchin shimshek qatnashqan kojaeli 4 – éghir jinayet sot mehkimisidiki sotta, jawchenning amanliqni saqlash xadimlirini öltürüshke urunush jinayitidin aqlinip qoyup bérilidighanliqi, biraq herbiy jasusluq bilen eyiblengen délosining istanbulda dawamlishidighanliqi bildürüldi.
kojaelidiki sot jeryanida jawchenning dadisi bilen 3 ménut körishiwélish telipi ret qilindi.
jawchenning sotta terjiman arqiliq özini aqlap, «men naheqchilikke uchridim, qoyup bérilishni telep qilimen» dégenliki qeyt qilindi.
jumhuriyet mupettishi eli choban sotta jinayetning xaraktérining özgirish éhtimali barliqini we jawchenning uzundin buyan tutup turuliwatqanliqini nezerge élip qoyup bérilishini telep qildi.
gumandarni aqlash üchün qattiq tirishchanliq körsitiwatqan adwokati yalchin shimshek jawchenning 2016 – yili 15 – noyabirda türkiyege kelgenlikini, aptomobil ijarige élip, istanbul, koniya, adana we nuseybinni ziyaret qilghanliqini, nüseybinde jiddiy halet yürgüzüliwatqan bolghachqa saqchilar teripidin aptomobili tekshürülgenlikini bildürüp yene mundaq dédi:
«jawchenning aptomubilida yiraqtin bashqurulidighan uchar kaméra we foto - süret apirati chiqqandin kéyin qolgha élinidu. nuseybin jumhuriyet teptish mehkimisi edliyening nazariti astida tutush sherti bilen qoyup béridu. andin jawchen ruxset élip istanbulgha kétidu. bu ariliqta ichki ishlar ministirliqi jawchenni chégradin qoghlap chiqirish qarari maqullighandin kéyin, istanbulda qolgha élinip, kojaelidiki qayturuwétish merkizige yollinidu. bu yerdiki resmiyetler 3 – 4 kün dawamlishidu. jawchen bu yerde wehimige chüshüp, saqchi memurliri bilen talash – tartish qilip jédel chiqiridu. shuning bilen jawchen heqqide qaytidin tekshürüsh bashlinidu. kojaeli jumhuriyet teptish mehkimisi jawchenning nuseybinde sot qilinghanlliqini bilgen turughluq, herbiy jasusluq bilen eyiblep yéngidin délo turghuzidu. u nuseybinde yene térrorluq teshkilati p k k gha eza bolghan depmu eyiplengen idi. kéyin kojaeli jumhuriyet teptish mehkimisi bu déloning öz hoqoq dairisidin halqip ketkenlikini seweb körsitip, istanbuldiki yuqiri teptish mehkimisige yollaydu»
adwokat shimshek gumandarning 2 délo bilen qolgha élinghanliqini we qesten adem öltürüshke urunush jinayitidin aqlinip sot mehkimisining qoyup bérish qarari élan qilghanliqini bildürdi we: «biraq istanbuldiki herbiy jasusluq délosi dawamlashmaqta. men istanbuldimu qoyup bérilishini telep qilimen. chünki bu eyibleshning asasliq pakiti yiraqtin bashqurulidighan uchar kaméra we foto - süret apirati. bu üsküniler burunla nuseybin jumhuriyet teptish mehkimiside tekshürülgen we shertlik qoyup bérish qarari chiqqan. jawchen 20 yildin buyan nirwa kisilge giriptar bir kishi. saqchilar bilen jédel qilishi we nuseybinge bérip qélishimu shu sewebtin bolghan. uningda bir xil galwangliq bar. uning nirwa késili heqqide amérikidin telep qilinghan késellik arxipi téxiche qolimizgha kelmidi. men shundaqtimu uning qoyup bérilishini telep qilimen» dédi.
