gülenni qayturup kélish üchün amérikigha yéngi höjjetler ewetildi

türkiye awazi radiyosi xewiri: izmir jumhuriyet bash teptish mehkimisi mexpiy guwahchilarning herbiy-siyasiy özgirish qozghash herikitining shexsen gülen teripidin pilan qilinip testiqlanghanliqini öz ichige alghan étiraplirini terjime qilip we höjjetleshtürüp, qoshumche delil süpitide amérika edliye ministirliqigha intérnét hemde pochta yoli bilen ewetken.

qeyt qilinishiche, «qozghun» kodluq mexpiy guwahchi öz ipadiside, herbiy-siyasiy özgirish qozghash herikitini pilanlighan kishilerdin armiye ichidiki imam adil öksüzning, 2016-yili 12-iyul heriket pilanini amérikigha apirip, gülenning testiqini alghandin kéyin, ijra qilinghanliqini ashkarilighan.

«shepke» kodluq mexpiy guwahchi bolsa, herbiy-siyasiy özgirish qozghash pilanining gülenning yolyoruq bérishi astida paytext enqerediki bir dachida teyyarlanghanliqini we adil öksüzning amérikigha apirip, gülenge testiqlatquzghanliqini éytip bergen. «shepke» munularni éytqan:

«izmirde herbiy-siyasiy özgirish qozghashqa qarshi chiqish mumkinchiliki bolghan we bu sewebtin hoquqidin élip tashlinidighan générallarning tizimliki shundaqla bu générallarni wezipisidin élip tashlashqa mesul xadimlar tizimlikining bizge yetküzülidighanliqi bildürüldi. 2016-yili 13-iyul saet 16:00 de bizge ewetilgen uchurda tizimlik yetküzüldi, ikki kün burun herbiy-siyasiy özgirishning 15-iyulda bolidighanliqini bilduq.»

élinghan melumatlargha asaslanghanda, amérika terep 15-iyul herbiy-siyasiy özgirish qozghash herikitining pilanlighuchiliridin biri bolghan adil öksüzning amérikigha barghan-kelgen waqitlirining tizimlikini telep qilghan.

amérikigha ewetilgen yéngi ispat höjjetliride, adil öksüzning amérikigha qaysi waqitta bérip-kelgenliki, ayropilanning seper nomurliridin we orun nomurlirighiche bolghan uchurlar orun alghan bolup, bu arqiliq amérikigha qoshumche delil-ispatlar ewetilip, tramp dewride gülenni qayturup kélish üchün yéngi heriket bashlanghan boldi.