«türkiye térrorluq teshkilati p y d bilen kélishti» dégen xewerler ret qilindi
ömer chelik esed hökümitining térrorluq teshkilati p y d ni qestenlik bilen eshu rayongha yerleshtürgenlikini tilgha aldi.
türkiye awazi radiyosi xewiri: yawropa ittipaqi ishliri ministiri ömer chelik türkiyening térrorluq teshkilati p y d bilen kélishkenlikige alaqidar xewerlerning toghra emeslikini éytti. süriyening shimalidiki weziyet heqqide toxtilip, esed hökümitini tenqid qildi we: «esed hökümiti térrorluq teshkilati p y d ni qestenlik bilen mushu rayongha yerleshtürdi» dédi.
ömer chelik anadolu xewer agéntliqigha bergen bayanatida, türkiyening térrorluq teshkilati p y d bilen kélishkenlikige alaqidar xewerlerning pütünley yalghanliqini bildürüp, «buni qetiy qobul qilalmaymiz. bezi döletlerning bayanatchilirimu özliriche <türkiye bilen kord unsurlar (yeni p y d ni démekchi) otturisida pütüshüsh yaki urush toxtitish ishqa ashti> déyiship yüriydu. türkiye musteqil bir dölettur. qanunluq bir dölettur. bundaq térrorluq teshkilatliri bilen oxshash sewiyede bahalarni bérip, goya ikkisi otturisida kélishim hasil bolghandek yaki pütüshüp qalghandek körsitilishini qetiy qobul qilalmaymiz» dédi.
ömer chelik esed hökümitining térrorluq teshkilati p y d ni qestenlik bilen mushu rayongha yerleshtürgenlikini tilgha élip, «esed hökümiti qozghilangchilar u yerning kontrolluqini tartiwalmisun dep, qestenlik bilen térrorluq teshkilati p y d ni yerleshtürdi. p y d u yerde esed hökümiti üchün bir saqchi ponkiti bolush rolini oynidi. hökümet eskerlirining bir türküm qoralliri ulargha tapshurup bérildi, shuning bilen esed hökümitining emeliy qollishi we righbetlendürishi netijiside p y d u yerni qolgha chüshürdi» dédi. gherb médiyaliri we bezi gherb döletliri rehberliri ilgiri suriwatqandek türkiyening kordlargha qetiy qarshi emeslikini tekitlidi. 2014 – yilida kobani weqesi yüz bergende bezi kord guruppilarningmu bu sheherge kirishi térrorluq teshkilati p y d teripidin cheklengenlikini eskertip, bu jeryanda kordlarning qetliamgha duch kélishini türkiyening tosup qalghanliqini tekitlidi.
yawropa ittipaqi ishliri ministiri ömer chelik «biz térrorluq teshkilati bolghanliqi üchün p y d gha qarshimiz. biz rayonda mezhebni we irqni asas qilghan döletlerning chiqishini xalimaymiz. buni xuddi türkiye kordlargha qarshidek shekilde sunush toghra emes» dédi.
