girétsiye: qachqun eskerler üstide girétsiye we yawropa qanunigha asasen höküm chiqirilidu

türkiye awazi radiyosi xewiri: türkiye tashqi ishlar ministiri mewlüt chawushoghlu herbiy-siyasiy özgirish qozghashqa urunush herikitidin kéyin, tunji yawropa ziyaritini girétsiyedin bashlidi. u girétsiye tashqi ishlar ministiri nikos kokiyasning teklipige binaen girit ariligha yétip keldi. u girétsiye tashqi ishlar ministiri bilen ötküzülgen gheyri resmiy körüshüshide, rayon weziyiti we ikki dölet munasiwetlirini muzakire qildi.

mewlüt chawushoghlu girétsiyening fethullahchi térrorluq teshkilatining herbiy-siyasiy özgirish qozghashqa urunush herikiti qarshisida namayan qilghan meydanining, türkiye xelqini intayin xursen qilghanliqini eskertip, türkiyening 15-iyul kéchisi bashtin kechürgen xeterni yawropa döletliri arisida girétsiye we girék xelqidin téximu yaxshi chüshinidighan héchkimning yoqluqini bildürdi.

u qibrista dawam qiliwatqan söhbet muzakireliri toghrisidimu toxtaldi. u: «mesililerni hel qilish üchün körsitiliwatqan tirishchanliqlarni qollaymiz» dédi.

girétsiye tashqi ishlar ministiri nikos kokiyas mewlüt chawushoghlu bilen körüshüshining ikki dölet munasiwetliri üchün muhim bolupla qalmastin, belki rayon üchün éytqandimu intayin muhim ikenlikini bildürdi. u 15-iyul herbiy-siyasiy özgirish qozghashqa urunush herikiti toghrisida toxtilip, mundaq dédi:

«girétsiye xelqining bu mesilide türkiyeni qollaydighanliqini mewlüt chawushoghlugha bildürdüm.»

girétsiye tashqi ishlar ministiri nikos kokiyas girétsiyedin panahliq tiligen herbiy-siyasiy özgirish qozghash herikitige qatnashqan eskerler toghrisidimu toxtaldi. u qachqun eskerlerning herbiy-siyasiy özgirish qozghash herikitige qaysi derijide qatnashqanliqi tekshürülgendin kéyin, sot mehkimisining girétsiye we yawropa qanunlirigha asasen höküm chiqiridighanliqini tekitlidi.  

girétsiyedin panahliq tiligen sekkiz qachqun eskerning guwahliq bérishining ikki kün ichide tamamlinidighanliqi kütülmekte.