uyghur ösmürler wapatining 51 – yilida muhemmed emin hezritimni untumidi
munewwer özuyghur xanim: «ewlatlirimiz öz ejdatlirini, bolupmu weten - millet üchün ulughwar izlarni qaldurghan qehriman mujahitlirini qetiy untumasliqi lazim.» dédi.
türkiye awazi radiyosi xewiri: üch künlük ziyaret üchün enqerege kelgen uyghur ösmürler guruppisi, uyghur dawasining aldinqi qatardiki rehberliridin muhemmed emin hezritimni wapat bolghanliqining 51 – yili munasiwiti bilen qebrisi béshida xatirilidi.
«sherqiy türkistan maarip we hemkarliq jemiyiti»ge qarashliq 30 kishilik ösmürler guruppisi, qazan nahiyesining teklipige binaen uyghur kéchiliki iptar ziyapiti pirogrammisigha kelgen bolup, ular türkiye jumhur reislik sariyi we türkiye büyük millet mejlisi (parlaménti) ziyaritini axirlashturghandin kéyin, uyghurlarning ataqliq rehberliridin tarixchi, yazghuchi we inqilapchi muhemmed emin hezritimning qebrisini ziyaret qildi.
uyghur ösmürler guruppisi, muhemmed emin hezritimning qebrisi béshida quran tilawet qilip, rohigha atap dua qildi.
uyghur ösmürler guruppisining yétekchi oqutquchisi munewwer özuyghur xanim bu ziyaretning tolimu menilik we ehmiyetlik bolghanliqini chüshendürüp: «ewlatlirimiz öz ejdatlirini bolupmu weten - millet üchün ulughwar izlarni qaldurghan qehriman mujahitlirini qetiy untumasliqi lazim. ösmürlirimizning yashlirining kichiklikige qarimastin, ulugh rehbirini wapatining 51 – yilida qebrisi béshida xatirligenliki, chin wapadarliqning ipadisidur. ewlatlirimizning bu pozitsiyesi pütün dunyadiki uyghurlargha ülge bolghusi inshaallah» dédi.
