erdoghan shéhit yéqinliri we ghazilargha iptar berdi
erdoghan «yüz yil ilgiri düshmenler qandaqsige kelgen péti tikiwétishken bolsa, bügünki kündimu térrorluq teshkilatini bizge salmaqchi bolghanlar we ularni qorbanliq ornida ishlitiwatqanlar yene bir qétim burnigha yeydu» dédi.
türkiye awazi radiyosi xewiri: jumhur reis rejep tayyip erdoghan térrorluqning yiltizini qurutqiche küreshning toxtawsiz dawamlishidighanliqini éytti.
erdoghan jumhur reisilik külliyeside shéhit yéqinliri we ghazilargha iptar ziyapiti berdi.
20 – iyuldin buyan dölet ichi we sirtida p k k térrorluq teshkilatining 7600 ezasining ujuqturulghanliqini, mökünüwalidighan kamarliri, öngkürliri we panah jaylirining asasliq köp qismining yoq qilinghanliqini shundaqla yoq qiliniwatqanliqini tekitligen erdoghan, térrorluq meslisi dölitimizning küntertipidin pütünley chüshkenge qeder küreshni qetiy dawamlashturidighanliqlirini, türkiyening térrorluqqa qarshi kürishining bir mawjudiyet kürishi ikenlikini éytti.
erdoghan térrorchilarning chet ellerdiki qollighuchiliri üstidimu toxtilip, «yüz yil ilgiri nechche ming kilométir uzaqlardin oxshimighan döletlerning armiyesini chanaqqelege basturup keltürgen seweb néme bolghan bolsa, bügünki kündimu dunyaning oxshash bolmighan jayliridiki türkiyege qarshi térrorchilarni bir sepke jem qilghan seweb oxshash. eyni chaghda istanbulni ishghal qilishning chüshini körüp yürgenler we 450 yil saqlighandin kéyin basturup kelgenler, mana bügünki kündimu térrorluq teshkilatlirini oxshash nishangha pichka ornida ishletmekchi bolmaqta. ehli selip yürüshliri we mongghul istilasi arqiliqmu ishqa ashmay, yérim qilghan ishlirini emdilikte térrorluq teshkilatliri arqiliq emelge ashurushni arzu qilishmaqta. bashqa idéologiyelik oxshimasliqlarni bir chetke qayrip turayli, bu qanxor, qoralliq térrorizim teshkilatlirini oxshash nishan astida birleshtürgen seweb del mana mushudur» dédi.
jumhur reis erdoghan sözide, «yüz yil ilgiri düshmenler qandaqsige kelgen péti tikiwétishken bolsa, bügünki kündimu térrorluq teshkilatini bizge salmaqchi bolghanlar we ularni qorbanliq ornida ishlitiwatqanlar yene bir qétim burnigha yeydu» dédi.
shéhitlik mertiwisining intayin yüksek ikenliki üstide toxtilip, «yerlikige qoyulghan her bir shéhitimiz we ghazilik mertiwisige érishken her bir qérindishimiz, dölet we millet bolush süpitimiz bilen mewjutluqimiz, birlikimiz we kelgüsimizning goya testiq tamghisi yaki qulupining achquchigha oxshaydu» dédi.
erdoghan istanbuldiki térrorluq hujumini sadir qilghan térrorchilarning adem bolalmaydighanliqini tekitlep, «quran kirim bu xil kishilerni ‹bel hum ezal› yeni ‹haywandinmu töwen turidighan› dep teripleydu» dédi.
erdoghan sözide yene, hujumdin kéyinki temkinlikning teslimiyetning emes, qetiy iradining ipadisi bolghanliqini tekitlidi.
