ghaziantep hujumi dairiside bir türküm kishiler nazaretke élindi

türkiye awazi radiyosi xewiri: ghaziantep saqchi idarisining aldida bombiliq hujum qilish weqesi yüz bérip, 2 saqchining shéhit bolushi, 4 nepiri puqra, 18 nepiri saqchi bolup jemiy 22 kishining yarilinishini keltürüp chiqardi.

yaridarlar doxturxanilarda dawalanmaqta. 

ghaziantep waliysi ali yerlikaya saqchi idarisi binasining aldida etigen saet 9 din 30 minut ötkende meydangha kelgen hujumning aptomobil bomba bilen élip bérilghanliqini bildürdi.

neq meydan tekshürüsh xadimliri weqe üstidiki tekshürüshlirini dawamlashturmaqta.

bu jeryanda, térrorluq hujumi yüz bergendin kéyin sheherdiki bir öydin ayallarni öz ichige alghan bezi kishiler nazaret astigha élindi. öydiki axturush jeryanida bir ow miltiqi qolgha chüshürüldi. gumandarlar soraq qilinish üchün wilayetlik saqchi idarisigha élip bérildi.

yene bir tereptin, jumhur reis rejep tayyip erdoghan ghazianteptiki térrorluq hujumi toghrisida alaqidar kishilerdin melumat igilidi we partlashta shéhit bolup ketken saqchilargha allahtin rehmet, yaridar saqchi we puqralargha téz shipaliq télidi.

bash ministir ehmed dawutoghlumu ghaziantep we nusaybinda hayatidin ayrilghan shéhitlerge rehmet tilidi, térrorizmni eyiblidi.

bash ministir dawutoghlu ghazianteptiki térrorluq hujumi toghrisida toxtilip, «qattiq tekshürülmekte. bezi muhim uchurlargha érishildi. ichki ishlar ministirliqimiz, waliyliq mehkimimiz kéreklik bayanatni élan qilidu» dédi.
dawutoghlu térrorluq weqelirining bu milletning birlik we barawerlikige ziyan yetküzelmeydighanliqini alahide tekitlidi.